ZALEN August 6, 2023 : Kumin January atanga June thla tawp thleng khan Mizoramah Tuberculosis (TB) vei mi 2,267 hmuhchhuah a ni a. TB hri vei hmuhchhuah zinga 70% chu Aizawla hmuhchhuah a ni. India chuan 2025 ral hma ngeiin umbo a tum.

TB natna hi India ram atang 2025 ral hma ngeiin umbo tum a ni a. Sustainable Development Goals 2030 thil tum zul zuiin ram dang tam zawk chuan 2030 ah TB hi umbo an tum a, India ram erawh chuan 2025-ah, kum 5 a rang zawkin umbo tum a ni.

ZALEN-in health department hnuaia State TB Cell thawktute hnen atanga thu a dawn danin kum TB vei hi kum 2019-ah 2,980, kum 2020-ah 2,121, 2021-ah 1,749, nikum 2022-ah 2,081 leh kumin kum chanve, January atanga June thla chhung khan 2,267 an hmuchhuak.

Hemi kum li leh a chanve chhung vek hian TB vang hian Mizoramah mitthi 314 an awm bawk a. TB natna avanga thi hi kum 2019-ah 56, 2020-ah 50, 2021-ah 72, 2022-ah 74 leh kumin June thleng khan mi 62 an awm a ni.

TB hi zu leh damdawi ti thin bakah HIV positive ten an thihpui nasa bik tih State TB Cell thawktute chuan ZALEN an hrilh bawk a. Heng mite hian damdawi an ei that loh avangin an taksa a chak lo a, natna dang an kai hma tih an sawi a. Mizorama TB vei zinga 15% vel chu HIV positive an ni tih sawiin India ramah erawh chawhrualin 3% a ni tih an sawi bawk.

TB vei te tana sawrkar senso

* TB natna hi ei leh in tha hmu lo/ei lo te nen a in kungkaih thuk hle a. Ei leh in tha hmu lo/ei lo ten TB an vei duh bik a, chutiang bawkin TB damlo te pawn an damloh chhung a ei leh in tha an hmuh loh/ei duh loh chuan an dam muang thei a ni. Sawrkar pawn hei hi ngai pawimawh in TB damlo ten TB natna an vei chhunga an ei leh in tih that nan an bank account ah thla tin Rs 500 a pe thin.

* Pradhan Mantri TB Mukt Bharat Abhiyaan scheme hnuaiah TB damlo ten chaw tha an ei theihnan tu pawhin sum a pek theih a. TB damlo 1 hi thla 6 chhung chawm/sponsor a ngai a, senso hi thla khat ah Rs 700 nin thla 6 chhung senso hi Rs 4200 a ni.