Ligue 1 hmahruaitu, Paris St-Germain chu Kylian Mbappe leh Lionel Messi te kawl mah se kuminah vawi kua zet an tlawm ta a. Pathianni zan khan Lorient chu 3-1 in an hneh lo leh.

Tun tuma an tlawm erawh chhuanlam tur an nei tha a, a tir minute 20 chhung leka yellow card vawi hnih a hmuh hman avangin defender Achraf Hakimi chu hnawh chhuah a ni a, hun tam zawk a tlem zawk ni chungin an khel.

Mikhual tan minute 15-naah Enzo le Fee chuan goal hmahruai a thun nghal a. Mbappe-a’n club tana goal thum tam ber a nihna belhchhahin minute 15 hnuah sut nghal mah se chawlhlawk hma minute ruk a la awmah Darlin Yongwa chuan Lorient hmahruaina thun belhin hun tawp dawnah Bamba Dieng-a’n an chakna nemnghetna a thun belh.

PSG hi March thla tira Champions League knock-out stage hmasa bera Bayern Munich an hneh loh hnu khan league-ah vawi sarih inlan tawhin vawi thum zet an tlawm tawh a, hengte hi anmahni mualah vek a ni nghe nghe.

Ligue 1 bikah an inlan hnuhnung vawi riatah goal chhuah loh tum an la nei miah lo bawk a, August-November, 1989 hnua goal hum an neih loh tum rei ber a ni tawh.

Tun hnaiah che tha tawk lo mah se Paris club hi an dinhmun erawh a ngaihtuahawm hran lo va, hmahruaitu niin Marseille aiin point riat laiin an la sang fal tho va, khelh hmabak panga an la nei.