ZALEN December 11, 2024 : Mizoram sawrkar Power & Electricity Department chuan kumthar atangin Electric Smart meter vuah tan an tum tih Minister F. Rodingliana chuan a sawi a, pre-paid pawhin bill a pek theih tawh dawn a ni.

P&E Minister sawi dan chuan smart meter vuahtu tur company, AMISP (Advanced Metering Infrastructure Service Provider) te nen pawh inremna an nei tawh a, anni lam chuan meter hi fit nghal mai an duh tawh a, mahse, Krismas leh Kumthar hman zawh hunah a vuah hna hi kalpui turin an tih ta zawk tih a sawi.

Smart meter-ah hi chuan meter-a current leh chhuak zawng zawng a chhinchhiah thei vek tawh dawn tih an sawi, P&E lam chuan hei hian current-a hman dan pawh a tichiang thei dawn an ti. Electric bill hi pre-paid a pek theih turin ruahmanna siam a ni a, Cheng 100/- chu pek lawk theih hniam ber turin an tintuah.

Sawrkar laipui hian Mizoram a Smart Meter vuah tura min rawn pawmpui zat chu hetiang hi a ni a, Mizoram pum tuam chhuah vek tum a ni.

Consumer Meter 1-phase   - 272866   

Consumer Meter 3-phase   - 16517   

DT Meter            - 2300       

Feeder Meter        - 398       

TOTAL       `    - 292081

Smart Meter Pre-paid hman thatna tura P&E Deptt. in an sawi te :

 Smart meter vuah avang hian bill a san phah dawn lo a, hman man dik tak a chawi theihna tur a ni. Tin, Distribution Transformer leh Substation a 11kV Feeder ah te Meter dah tel a nih dawn avangin a kar laka power kal ral a hriat tawh dawn a, Electric hman ruk te a tlem sawt tawh dawn a ni.

 Data entry sual, Meter Reading diklo etc. avanga Bill diklo te a bo tawh ang a, heng avanga Consumer te’n Bill complaint nana hun tam tak khawhral fo thin kha a ziaawm tawh ang.

 A hun taka Bill dawn lohte, Bill siamsualte, Reader kalloh avanga a hnua bill innghakkhawl thin te a awm tawh lo ang.

 Bill pe tura thla tin intlar ngai a awm tawh lo ang. Prepaid a nih tawh dawn avang leh 24x7 online bill payment a nih dawn avangin mahni inlum/hmundang atangin eng hunah pawh mamawh tawk ang zel in kan top up thei tawh dawn a ni. Bill Top up na tur a tlem ber (minimum) hi mipui tana harsa lo thei tur a ruahmanna siam a ni ang. 

 Mi zawng zawngin renchem tak leh tangkai taka power hman anih tawh dawn avangin leh dan dik lova power hman rukte a awm tawh dawn loh avangin load a tlahniam deuh ang a; hei hian Transformer overload etc. avanga buaina awm thin hi nasa takin a tih ziaawm beisei a ni.

 Prepaid a nih tawh dawn avangin kan hman tur duhzat kan bituk thei ang a, chu chuan power mana sum kan sen a titlem bawk ang.

Power Minister chuan Smart City te nen tang hovin Bawngkawn leh Kulikawn inkara electric ban zawng zawng chu thlak tur a nih thu a sawi a, ban thar sang zawk hman a ni dawn a, ban hlui te chu phawi vek tur a ti a, hei hian khawpui chhunga wire inzam hnawk lutuk pawh a tihziaawm a rin thu a sawi bawk.