ZALEN February 3, 2026: Ministry of Micro, Small, Medium Enterprises (MSME), National Scheduled Caste (SC)/ Scheduled Tribe (ST) Hub nen tangkawpin LESDE chuan February 10-14, 2026 chhung hian 'LESDE Kut' a buatsaih dawn a, LESDE Minister chuan Mizoram-a Kut hawlzau ber tur a nih thu a sawi.

LESDE Kut in a tum ber chu Vendor, manufacturer, service provider, buyer leh Ventral leh State Government Agency te inkara remchanna siam sak a ni, tualchhung siamchhuah leh service tihhmasawn te, thalaite chu sawrkar mamawh thil lei dan leh vendor registration kalphung hriattir te, technology hmang tangkai tura fuih te, Entrepreneur inphochhuahna hun remchang siamsak te, thalaite ram pawna hnathawh theihna kawng kawnghmuh leh Aspirant leh ehtrepreneur te tana one-stop solution pek te a ni.

LESDE Kut-ah hian Department hmalakna pakhat angin hna zawng lai zawng zawngte tan Job Fair buatsaih a ni dawn a, he hunah hian mi hrang hrang an rawn inphochhuak dawn a, stall 100 chuang awm tura ngaih a ni.

Zirlai an hmalam hun la chiang lo te tan career guidance neih a ni dawn a, Aizawl, Lunglei leh Siaha District-a Industrial Training Institutes (ITI) ten an course hrang hrang neih te hemi hun chhung hian an pholang dawn a nia, a hmunah hian registration chi hrang hrang tih theih a ni ang.

PSU paruk ten 'Seminar cum Awareness Programme on PM NAPS, an buatsaih dawn a, MPOCWWB-a inziaklutte tan Eizawnna Kailawn leh Rahbi Chhertu Scheme hawn a ni dawn bawk.

He Kut hman turah hian Florist Association, Pangpar zuar association, Art Exhibition, food court leh naupang intihhlimna hmun Child Play Station te a awm dawn bawk a, hei mai bakah hian a tawp ni-ah Fashion Show leh Concert te a awm dawn a, Cosplay, vlog thlalak intihsiakna te a awm dawn bawk.