ZALEN February 10, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin chawhnu khan Labour, Employment, Skill Development & Entrepreneurship Department buatsaih, February ni 10-14 chhung awh tur 'LESDE Kût 2026 chu Khuallian niin Aizawl Lammualah a hawng. 

Larsap chuan Mizoram Building and Other Construction Workers Welfare Board (MBOCWWB) hnuaia project kalpui tur 'Eizawnna Kailawn' leh 'Rahbi Chhertu' a tlangzarh bawk. He hunah hian LESDE Minister Lalnghinglova Hmar chu Khualzahawm a ni. 

Lalnghinglova Hmar chuan LESDE Department chu nitin khawsak leh eizawnna nen a inngheng tlat tih sawiin, mizo thalaite'n eizawnna ngelnghet an neih theih nana puih, bana kaih leh zawrh ngam thiamna neih tir an ngaipawimawh tih a sawi a. LESDE Kût kaltlangin office dawr tura hmun hran hran kal ngai lova hmun khata dawr theih tura ruahmanna siam a nih thu sawiin, thalai hna zawng lai leh la zawng turte huikhawma fuih phur turin he Kût hi siam a ni, a ti.

LESDE Minister chuan Eizawnna Kailawn leh Rahbi Chhertu project-te chuan hmasawnna thar siamin, mizote eizawnna a siam sak dawn tih a sawi a. Mizo mipuite chu Mizoram Building and Other Construction Workers Welfare Board chu ngaihvena inziaklut turin a sawm nghal bawk. 

LESDE Kût hi Mizoram Sawrkar hmalakna niin, LESDE Department leh a kaihhnawih board leh institution hnuaia service, programme leh hlawhtlinnate phochhuah a ni a. Thalai, MSME, entrepreneur, hna zawng mek, hnathawktu leh anmahni kaihruai theitu turte chu a kaihhnawih te nen thlunzawmin, hna, thiam thil leh hamthatna dang te hre chiang turin hun a siam sak a ni. 

He Kut hi 'Made in India' leh 'Atmanirbhar Bharat' chawilarna niin, state leh regional level trade fair kaltlangin thil siam hrang hrang phochhuah a ni a. Micro and Small Enterprises (MSEs) nen tangkawpin Mizoram leh North Eastern Region-a entrepreneur-te Sawrkar laipui hnuaia Ministry leh Mizoram Sawrkar Department te nen a thlunzawm bawk.