Aizawl; December ni 10-12 inkar chhunga Thalfavang Kut, Tuirial Airfield-a neihah Zirtawpni khan traffic jam vangin mi eng emaw zatin a hmun an thleng thei lo a, mi tam tak chu beidawngin an haw hial a ni. A hmuna Zalen palai sawi dan chuan motor 300 chuang inhnawh tawt leh truck lian chhe bawk chuan lirthei che vel a tibuai nasa a. Zan dar 8-ah pawh hmun thenkhat ah chuan lirthei a che thei lo a ni. Traffic SP Lallianmawia chuan theih-tawpin an inbuatsaih chungin an hriat phak baka harsatna - BSF motor chhia leh motor kang pakhat a awm vangin an tawk ta tih Zalen-in a biaknaah a sawi a. “Officer 1-in duty a ho a, kan tih tur chu kan ti a, zing atanga zanlai thlengin an duty a ni,” tiin a sawi bawk. Tourism Director Vabeiha Hlychho chuan traffic jam chhan chu an hre ve lo tih sawiin Traffic lam mawhphurhna a ni tih Zalen a hrilh a. Nakum lamah neih chhunzawm an tum thu a sawi bawk.