C.Dorema
4/30, Khasi Veng, Kulikawn
Aizawl -976005

Aizawl khawlaia kutdawha vak vel thinte leh kawngsira zai thinte hi mi zawng zawng hian lainatna thinlung kan pu theuh ang tih ka ring. Tin, lo tanpui thintu tam tak tan pawh ni tina hmuh reng theih tura an awm hian rilrua kan khawngaihna leh kan lainatnate pawh hi zawi zawiin a danglam vein a tlahniam thei ang tih ka ring a. Tin, a kut dawhtu tan pawh hetianga ni tina awm reng hi a remchan loh leh theih loh hun a lo la awm ang a, chung hunah chuan engtin nge an awm zui ang tih hi ngaihtuahin a thlir fo thin. A pawimawh berah erawh chuan kut dawh mai lova an tih theih ve tawk ang ang hmanga ei hmuhna an neih theih dan tur ruahmansak emaw, chutiang kawhhmuha bul tanpuitu awm thei ila chuan a duhawm hle a ni.

Hnam changkang zawkte hi chuan pianphunga rualbanlo leh hrisel lohna avanga hna thawk thei lo an neih angte hi engtin emaw tak chuan an chhawmdawlin an theih ang leh tlin tawk ang anga ei an hmuhna tur kawng an ruahmansak thiamin anmahni ngei pawh hian nasa takin an zir thin tih hi a chiang reng mai. India ramah pawh hian tunhma atang khan Punjab state-ah te khu chuan ‘kutdawh kan nei ngai lo’ ti thei khawpin he lamah hian awareness an neiin hma an la chu a ni ngei mai. Keini Mizoram pawh hi tunhma khan kutdawh awm lohna kan ni ti theiin kan awm ve thin ni khan ka hria a; engati nge tunah hian kan lo neih tak? tih hi ka rilrua ka inzawt a ni. Mission Venga pianga seilian ka ni a, kan naupan lai chuan Mission Veng Kohhran hian mi pahnih enkawl kan nei thin a. A mipa zawk chu Pu Saia (Sai Butua tiin a hming lem an vuahsak thin) a ni a. Tuna Mission Vengthlang leh Khatla leh Model veng te inkalpawhna kawng peng thuam laiah khuan in tereuhte hi an saksak a, chutah chuan a khawsa ve a, tun thlengin a kawn hmingah pawh Pu Saia kawn tia sawi thin a ni a, a ei tur engkim Kohhranin an pe mai thin. Chutianga Kohhran chawm leh enkawl a ni chung chuan a intilalin a inngaisang khawp mai a, British sipai lalber Field Marshal ni hian a inhre tlat mai a, englai pawhin sipai officer angin uniform nen a inthuam reng thin. Hetiang mi hi ni mah sela, a nuna danglam tak chu zanah hian tlaivara tawngtai chang a nei thin a, chungah chuan veng chhunga chhungkaw hrang hrang hming lamin an tante a tawngtai thin a ni an ti.

Tin, pakhat leh zawk chu Pi Daii a ni a. Ani hi chu Ngawivungruam an tih, Upa Lalrongenga (L) in bul, Pu Lalhmuchhuaka te gate bulah hian a chenna in tur Kohhranin a saksak a, hetah hian a thih thlengin a cheng ni tain ka hria. Chutiang chuan Kohhran miten kut dawh tur ang chi chu ngaihvenin an lo chhawmdawl a, mahnia an khawsak theih hunah anmahnia ei zawng tate leh hna thawk tura an chhawr zui leh an thih thlenga an enkawlte an awm thin ni awm tak a ni. Tunah pawh hian Mission Veng Kohhran hi chuan an tualchhung thawhlawm atanga 10% chu rethei leh damlote tan an hmangin an dah thin a ni.

Tin, tun hma deuhah khan Pu T.Lawmthanga (L), Sikulpuikawn pawh khan tawngtheilo Pu Zadailova (L) kha pheikhawk siam zirtirin dawr a buatsaihsak a, a hnuah phei chuan tawngtheilo bawk, Pu Para kha a lo tel a, Republic lam atangin kebai dang pakhat (Pu Liana ni ta maiin ka hria)-in rawn belhin pheikhawk thar siam hna thlengin heng rualbanlote hian an thawkho thin a ni. A ei khawp chu an thawk chhuak em em tih a lang reng mai.

Chutih rual chuan mi pangngai lo leh hnathawk thei lo thenkhat chu mi tuten emaw an awmpuiin an chawm sawi tur an awm nual mai. Tunhma deuha Aizawl miin kan hriat lar thenkhat - Zatawna te, Kutbuli te, Pamuma te, Lungruni te, Rongaii te, Pathuama te, Nasanala te, etc. te pawh kha chhungkaw hrang hrangin an chenna inah ei tur leh mutna an lo pe mai a, a then chuan awm nghehna deuhte an nei a, a tam ber kha chu an tawn remchan apiang an bel mai ni ta awmin ka hria. Vawiin ni thleng pawhin hetiang kawnga mi anglo leh rualbanlo khawngaiha tuam hlawmtu sawi tur an awm thin. Thanghuaia, Aizawl chhim lam veng hrang hranga khawhar in apianga thu sawi thin pawh khan a thih thlengin awmna mumal tak, Mission Vengthlangah a nei a nih kha. Keini Kulikawn vengah pawh hian chutianga mi pangngai lo leh rualbanlo enkawl lai nei sawi tur an la awm a, an fakawm hle a ni.

Tunah hian Aizawl khawpuia Kohhranhote hi ramin hma a sawna a lo thang zel ang hian kan thang chho va, sum leh pai pawh kan lo thawh khawm tam ta. Biak In tha, mawi leh ropui tak tak sa theiin kan lo awm ta a; chuvangin, tunhmaa Kohhranho aia nasa taka dinhmun tha zawk leh hausa zawkte hian hetiang rethei leh harsate hi kan ngaihthah ta em ni ang tih hi ngaihtuah thar atan a duhawm hle mai. Tlema kan hawiher thlakin rethei leh chanhaite lam tinzawn hian Kohhranhote hian ke han chhep thei tlang ta ila chuan tuna Aizawl khawlaia kutdawha thu thin leh in hrang hranga lut kual thin kutdawh mi tlem tête hi chu kan zep ral thei ang tih a rinawm khawp mai.

Tin,kutdawh thenkhatte hi chu sum leh pai lama tanpui ngawt lovin an kut leh ke ngei hmang tangkaia eizawnna ngialnghet an neih ve dan tur ngaihtuahsak hi anmahni dinhmunin a tlin phawt chuan a thain a pawimawh ber chu a ni dawn a. Sawrkar lamah Social Welfare leh department dang dangah pawh hian hetiang kawnga hmalak theihna leh chhawmdawlna tur awmte dap chhuahpui a, an tlin ang anga an kut leh ke leh an theihnate hmang tangkaia ei anmahnia ei an zawn theihna tur leh an sawtpui theihna tur ngaihtuahpui hi Kohhran leh tlawmngai pawlte hian tun aia nasa hian engtopui ila chuan kan khawpuia kutdawh tlemte chauh awmte hi chu mahnia ei zawnga khawsa leh mahni intodelh theiah kan siam vek thei ngei ang le. Hetiang kawng hian kan khawlaia kutdawha vak vel hmuh tur awm lo tur hi chuan kan siam thei ngei ang tih hi a beiseiawm tlatin ka hria.

Chutih rual erawh chuan, kan zinga pianga seilian, Mizo mi leh sa nghet kutdawha awm ta hi an vâng hlein ka ring. Chutiang chu thil awm dan a nih avangin heng zinga mi thenkhat hi chu Mizoram pawn atanga hetiang ti tur renga lo kalte pawh an ni mai thei. Ram pawn lama an chhungte chawmna atana helaia kut rawn dawhte pawh an awm hial thei ang. He laiah Kristian kan nihna avanga lainatna thinlung thuk zawk pu thin kan nih hriaa lokalte leh hmun dang aia hmuh that zawk beiseina avangte pawh a ni ve ang. Tin, an lo ni lo a nih pawhin an awmna Kohhran leh khawtlanga tel reng reng lo leh inhnamhnawih lote leh awmna mumal nei lova miten an hriatchian hmaa insawn kual mai mai thinte pawh an awm thei ang. Chuvangin, an lo tlukluhna veng neitu YMA Branch-ten pem lehkha an demand thin hi a tha khawp mai a. Hetiang kawng hian lo awm thar apiang hi tute nge an niha, khawi atanga lo kal nge an nih, tihte uluk zawka ngaihvena an identity en chiansak hmasa phawta an chanchin record te pawh vawnga ngaihtuah zui thin theih ni se a pawimawh khawp ang. Tun atanga hetiang kawngah hian kan fimkhur viau loh chuan, keini Mizote aia tam mah, ram pawn lam atanga lo lut mai thei kan chheh vel khaw chhak leh khaw thlang ramah te hian mi an awm reng a ni tih hriat a pawimawh tih hi hriat a pawimawh hle bawk a ni.

Hetiang kawng hian kan area chhunga kutdawh lo awm, kan hriat chian lohte hi an chanchin lo hriat hi Kohhran leh khawtlang hian ngai pawimawh thei ila, dawm kan theih an nih pawhin a dawm kan dan ngaihtuahsak hi Kristian kan nihna leh khua leh tui tha kan nihnaah kan tih atana tha leh tangkai a nih si avangin ka han tarlang ve duh a ni e.