Mizote hi kan pi leh pu atanga lonei thin kan ni a, tun thlengin thingtlang lamah chuan thlawhhma neih hi an eizawnna bul ber a ni. Khaw tam takah chuan huan te siamin an thlaithar te an hralh thin a. Khaw thenkhat chuan thlai chin bik neiin sum lakluhna tha takah an hmang a ni.

Kum 2000 bawr vel atang khan Hnahlan leh a chhehvelah grep chin tan a niin chhungkaw tam takin eizawnna atan an hmang a. A hnu deuhah Champhai leh a chhehvel khua ten an ching leh bawk a. Khawchhak tlangdung hi grep hian a ngei viau ni tur a ni, an thar tha em em mai a. Chhungkaw tam tak chuan in leh lo dinin an dinchhuah phah hial a ni. Hnahlan leh Champhai ah te hian society dinin an hmalakna in winery din a ni a, grep thar te leiin kuthnathawktute hnenah sum tam tak a lut a. Kuthnathawkte pawh an phurin nasak takin hak an zauh a, grep chin hi a hlawk miau avangin mipui pawh an taima in theihtawp an chhuah a ni.

Mizoramah Congress a sawrkar hnuah zu chu phalrai a ni a, hei vang hian grep chu a hralhna lamah a lo hnawng ta a. Grep market a awm that miau loh avangin chhungkaw tam tak chuan an eizawnna chu an thlak a lo ngaih phah ta a ni. Mahse kum 2018 a MNF sawrkar a lo din khan grep chingtute hian sawrkarah beiseina sang tak an nei a, grep chin bultan tirtute an nih avangin sawrkar chuan a ngaihsak an beisei a ni.

Mahse tunhnaiah sawrkar chuan dan anga grep tui hralhna ngaihtuah aiin khap tumin hma a la ta zawk nia hriain kuthnathawktute chu an beidawng hle a, an phurna pawh nasa takin a tlahniam a ni. Tuna kuthnathawk ten an mamawh ber chu grep tui hralhna hi a ni a, dan ang taka hralh phalna sawrkarin a siam loh chuan an tan tihral a buaithlak a. Dan mumal tak awm sela chuan Mizoram chhunga tiral lovin state dangah pawh tihralna tur a awm a, mahse dan tlawhchhan tur a awmlo lai tak hi an harsatna chu a ni.

Sawrkar tha chuan a khua leh tui te harsatna leh mamawh chu a ngaihtuah sak tur a ni a, tuna grep chingtute harsatna pawh hi a sutkian dan a dappui ngei tur a ni. Khawvel hmun hrang hrangah sawrkar ten an khua leh tui te thilsiam leh tharchhuah te an tihlar sakin a hralhna tur pawh an ngaihtuah sak thin a. Kan state sawrkarin kuthnathawkte ti beidawng zawnga hma a la hi a fuh lo a, an harsatna te sutkian dan ngaihtuah puiin a tiphur zawnga hma a lak hi a tihtur a ni.