Billionaire beauty mogul Kylie Jenner chu a ruak lo tih khawthlang media te chuan an tarlang leh ta chuai chuai mai le - American rapper Travis Scott lakah a fa pahnihna tur a pai leh mek.

Caitlyn Jenner chuan a fanu Kylie Jenner-i'n nau a pai thu hi Ningani khan a sawi chhuak a, thla engzat nge a nih tawh tihte chu an inrin siak nghal luia luai a ni. 'Keeping Up With the Kardashians' star Kylie hian August 10 khan kum 24 a tling a, tum dang ang lo takin a pianchamah hian social media lamah thlalak a pholang lo. Hei hi a nau a pai vang leh mipui vantlang hma hmuha thup rih a la duh vang niin an sawi. 

Hetih lai hian Kylie hian nau a pai ngei em tih a la sawi chiang lo thung a, hun reiloteah a chiang thuai turah ngai ang. Kylie naupai thu hi 'Page Six' chuan an tarlang hmasa ber a, nimin khan 'Daily Mail' ten Kylie thupuangtu an zawt ve leh a, amaherawhchu, chhanna mumal a pe lo. Kylie nau pai hi mipa nge hmeichhia tih hriat a la nih loh bakah, a nau neih hun tur pawh a la hriat loh niin an sawi - nau a pai tih an hriatna a la rei lutuk lo pawh a ni mai thei.

Stormi chhang tur chu...

Kum 24 mi Kylie Jenner leh Travis Scott (30) te hian fanu kum thum mi Stormi Webster an nei tawh a, an la duh tawk mai lo. Stormi pian hnu hian an inkar a khi niin an sawi a, thawk khat lai khan an inthen ve ren ren. Hun eng emaw chen an chen dun loh hnuah kum tir lam deuh khan an inkar a tha leh tawh tih Kylie Jenner chuan thlalak hmangin a rawn tarlang a, Stormi pa lan telna thlalak chu social media lamah a tarlang a ni. 
Kylie leh Scott te hi April 2017 tang khan an inzui tan a, an chanchin ngaihventu an tam hle. Kylie hian rapper Tyga a lo kawp tawh bawk a, Scott nen an inkawp tirh lam pawh khan an chanchin hian sawi a hlawh hle a ni.