ZALEN, Jan. 9, 2025: Bike intlansiaka Mizo zinga hriat hlawh, K.Lalnunsanga chu India ram mai ni lo, khawvel huapa motorcycle helmet siamtu lian, KYT Helmet-in an thawhpui dawn a, engkim tihfel tawh a ni.

KYT Company hian kum 1998 atang khan racing motorcycle helmet a siam tan a. Electric Veng, Aizawl tlangval hi a sponsor dawn a ni.

Nunsanga hi nikuma Mizoram Motorsports Association (MiMSA) buatsaih Tuirialah khan Aizawl Racing Club (ARC) tan inlanin expert-ah a champion a, over all-ah vawi li zet a lo champion tawh bawk.

Kum 2019 khan national-ah a lo champion tawh bakah kum 2017 khan Suzuki Redbull road to Rookies Cup over all-ah pahnihna a ni bawk a. Kum 2018 Asia Road Racing Championship-ah pathumna a lo ni tawh bawk.