Aizawl: Health & Family Welfare department hnuaia Food & Drug lam hotute chuan Aizawl sanghaa dan phal loh vawnthahtna Formalin a awm leh awm loh chu an Food Testing Laboratory, Zemabawkah an endik mek tih an sawi a, hetih lai hian Forensic lamin an lo enfiah tawhah chuan Formalin pakhat mah hmu lo mah se sample an lak chu a tlem em avangin fimkhur a la ngaih tho thu an sawi. Food & Drug hotute chuan ZALEN zawhna chhangin sangha sample chu sangha thlen khawmna Bawngkawn bazar atangin Kg 1 leh a chanve, piece tam tak hmun hrang hranga mi an la tih an sawi a. Hei hi an Food Testing Laboratory thar, Zemabawka awmah chuan an test mek tih an sawi a. Nilaini atang khan test turin an bei tawh tih sawiin current awm lovin harsatna a siam bakah an khawl te chu hman miah loa dah rei tawh a nih avangin a solution siamna lamah harsatna an tawk tih an sawi a. Naktukah hian test hna hi an chhunzawm leh dawn niin an sawi bawk. Forensic department chuan sangha sample chu an duhthusamin an la tam lo tih sawiin Aizawl bazar atanga an lak thu an sawi bawk a. An sample laknaah Formalin hmuh ni lo mah se hmun dang sanghaah Formalin hi a awm lo ang tih a sawi theih ngawt loh tih an sawi bawk. Manipur, Nagaland leh Assam-ah te sangha lakluh khap a ni mek a. Ni hnih khat liam ta khan Kerala, Andhra Pradesh, Odisha leh Tamil Nadu-ah te formalin sangha hi hmuhchhuah a ni leh bawk.