Aizawl May 24, 2023 : Mizoram Merchant Association (MIMA) Executive meeting chuan Mizoram-ah Labour Law hman an duh loh thu an rel a, Mizo hnam kal zel turah hman tha an ti lo. Sawrkar kal tawhah pawh MIMA ngaihdan la-in tun thlengin la hman a la ni lo an ti. State dangah pawh Proprietorship angah chuan hmang an la awm lo, an ti bawk.

MIMA chuan, Factory lian, Insurance Company, Private Bank, private Hospital lian etc. ah te chauh hman a ni. Heng an hmannaah pawh hian a chhawrtu lam hian hreawm an ti niin an hria. Law Court-a inkhin te, hnathawh mamawh hun lai taka kar neiha nawrh huaihawt te, hnathawh hun laia danin a phalsak anga chawlh lak te bakah harsatna tam tak thleng tawh leh thleng mek a awm, an ti.

Council of Minister meeting-ah Shops and Establishment Acts leh Minimum Wages hman chungchangah LESDE Dept. in proposal siamin a ngaihtuah nia an hriat thu MIMA chuan an sawi. "Hei hi Labour Law chiah a ni. Hei hi ngun taka ngaihtuaha, sumdawnna kawnga kan hnam kal zel tur ngaihtuaha ti lo turin MIMA chuan sawrkar a ngen a ni. Hnam upa zawk leh sumdawnna kalpui hmasa zawkten Proprietorship-a an hman loh hi engvanginnge Mizoram hian a hmanna chhan tur MIMA chuan a hre lo a ni. A hnuaia mi point tarlan te hi sumdawngte tan tih ngaihna a awm lo a ni," an ti.

MIMA chuan hnathawkte tana hamthatna pek tur bakah hian thil tam tak sawi tur a awm a, an tarlangte hi tlem chauh a ni an ti. Semi Government ang maia kalpui tumnaah puhin an duh loin a pawm thei lova, hmansak lo hram turin MIMA chuan Mizoram sawrkar an ngen.

Labour Law hman a nih a hnathawka chhawr ten hamthatna dawn theih tur thenkhat an tarlan chu a hnuaia mi te hi a ni.

1. Kar khatah ni khat leh a chanve chawlh ziah

2. Kum khat chhunga chawlh khawl theih anga chawlh pek zat awm, chawlh pek

3. Doctor Certificate hmanga Medical leave pek

4. Thuneitu phalnain kum khat chhunga ni 90 chawlh phalsak. Hei hi sawrkar in thuneitu tura a ruatte tihna a ni. 

5. Labour law in a phalsak anga firm pakhata mi 7 thawk chin chuan Association an din theih ang a, nawrh phalsak 

6. Casual leave pek

7. Ni 30 chin engemaw rokhawlhna avanga thuneituin chawlh pek theih 

8. Central leh State Sawrkar chawlh apianga chawlh pek

9. Thil bo leh rinawm loh chungchanga hnathawkte evident awm a nih loh chuan ban mai mai theih loh te leh ban dawn chuan thla 
6 hlawh pek ngai