ZALEN December 1, 2025: Vawiin khan Congress Party chuan Congress Bhavan-ah Political Session kan nei a, he hunah hian President Lal Thanzara chuan LADC-ah ZPM chu an in set sual a, Congress-in an hlawkpui viau dawna an ngaih thu a sawi.

Lal Thanzara chuan, "Lai Autonomous District Council (LADC) inthlanna neih mai turah Congress a meizanghlaptuah kan tel ngei kan ring a, phur takin hma kan la a ni. Lai mipuite kan candidate te lo thlang ngei turin ka ngen che u a ni," a ti.

"LADC-in Congress sawrkar laiin harsatna an nei ngai lo, an budget in a daih loh pawhin RE an siama kan pe leh mai. ZPM MLA Pu Lorraine Chinzah an party tana tha ber tura ruahmanna a lo siamte ZPM thuneitu ten an paihsak bakah, a laina hnai pawh seat an pe lova, ZPM an in set sual hle a. Congress in kan hlawkpui viau dawnin kan ngai a ni," a ti. 

MPCC President chuan, "Congress ten hlawhtlin kan duh a nih chuan inngaihtlawmna leh Lalpa tiha kan pen a ngai a, chawimawina hi Pathian ah a awm a ni tih kan hriat a ngai. Chapo leh fel leh tha inti, intithiam tak kan nih chuan Pathian in a duh lo tih kan party mipui ten kan hriat a ngai a. Kumthar pawh chumi hrereng chuan tan ila, kum 2028 ah malsawmna kan dawn ngei ka ring a ni."

"Kum 2028 ah Pathian zara kan sawrkar a nih chuan Zoram a mirethei te khaichhuah an nih leh nan NLUP changtlung zawk kan kalpui leh dawn a. Hei hi mi tam tak ten Congress sawrkar an nghahhlelh em em na a ni bawk. NLUP changtlung zawka kan kalpui nan Road Map Committee kan nei a, thingtlangah zokhuaah kalchilhin ram leilung boruak te zirin an fehchhuak mek reng a ni," a ti bawk. NLUP sawiseltute hian an huphurh lutuk vang a ni a, NLUP a chhia tia sawi an awm chuan a tha hle zawk tihna a ni a ti.

Banakaih chuangchang sawiin Lal Thanzara chuan, "Sawrkar lai mek ZPM te Banakaih te pawh hi sem ni lo ti mahse, bank loan an puksak a. Bank loan puksak te ai chuan an bultanna tur kan pe thei a nih chuan a mamawhte tan a hlu em em zawk a ni. ZPM te Banakaih hi kum hnih an sawrkar tawh chhungin mi 257 hnenah chauh an la pechhuak a. MLA constituency 40 tinah Banakaih mi 6 vel chauh an la nei tihna a ni a, mipui a huap lo hle," a ti.

Tunhnai lawkah Lunglei khawpuia State University dah a nih tur thu Chief Minister in a puang hi a lawmawm a, Lunglei a State University dah ngei turin duhsakna an hlan a ti bawk.