ZALEN November 27, 2025: MNF Vice President Lalchhandama Ralte chuan Lai Autonomous District Council Inthlanpui lo awm tûrah campaign hun a hmang mêk a. Khaw hrang hrang a tlawhnaah thu sawiin, Lawngtlai district chhûngah sawrkar thar, MNF kaihhruai sawrkar a pian ngei a rin thu a sawi a. "Kan khingpuite hi sum leh pai ngah tak tak an ni a, keini chuan sum leh pai chhuan tûr kan nei ve lo. Pathian chakna ringa mipuite hna thawk tûrin kan rawn inzuar mai a ni," a ti.

Lalchhandama chuan, "ZPM te'n sawrkar ve châkin thu leh hla hmangin Zoram mipuite nasa takin min awi a, kalphung thar mipui sawrkar kan din dâwn, kuthnathawktute hmangaihtu kan lo chhuak dâwn e, tiin thil tam tak min tiam a; Kohhran thinlung hneh zâwng leh thalaite hneh theih tûr zâwngin an inzuar kual a, sawrkar hnathawkte tân îtawm takin an inzuar bawk. MNF ni lo, Congress ni lo kalphung thar sawrkar kan din dâwn an ti a, Zoram thatna duhtute chuan anni ngei hi Pathian belruat an ni ang tiin, hneh takin seat 27 kan pe a ni. Chutichuan, beiseina sâng tak nêna kan thlîr thup laiin, Sakei Beram vun sin kha reiloteah a ze tial a lo lang a. A che hrut a, a Beram vun sin a lo inlip tan ang khân, he Sawrkar hi a nihna tak a lo lang ta a ni," a ti.

"He sawrkar kum hnih pawh la tling chiah lo hi thlir dân kan nei ta a. An sawrkar vung lai takin Sinlung Hills Council inthlanah an tla a; Dampa bial bye-election ah ruling party chu sâng taka tling tûra ngaih an nih laiin vote 562-in mualpho takin an tla leh a ni," Lalchhandama chuan a ti a. Vawiina sawrkar mêkte hi hrin hran hran an ni a, an inbân siak tan mêk a, bâng leh mêk tûrte pawh an awm tih sawiin, ZPM chu 'bêl keh phuarkhâwm, tui pai thei lo' an lo tih thin ang kha an nih thu a sawi bawk.

MNF Vice President chuan Lai ram mipuite duhsakna nen LADC hmakhua pawimawh tak sawiin, "LADC-ah sawrkarna kan chan chuan, mipui thlan tlin te'n an duh duha anmahni party leh anmahni thlang tlingtute an insawn san theih thinna chu tihtâwp kan tum dawn a. Hnam zahawmnate vawng tûrin Anti-Defection Law hman a nih theih nan hma kan la dawn a ni," a ti.

MNF Vice President chuan, "Kan state sawrkarin ramri hnaih lama awmte, kan unau Lai mipuite tân pawha tha lo em em FCAA 2023 a adopt tak avâng hian kan hnam zahawmnate, 6th Schedule hnuaia District Council-in ram leh leilunga kan thuneihna zawng zawng min pal chhiat sakna zawng zawngte, kan hnam pawi an khawihnate hi hriaa kan lo kawm serh a ngai a ni," a ti bawk.