ZALEN, December 21, 2025: Ni 20, December chawhma dar 9-a thi Chief Minister hlui Lal Thanhawla nupui, Lal Riliani chu vawiin Pathianni chawhnu dar 1 khan a lawina Zarkawt Presbyterian Kohhran Sunday School Hall-ah Rev. Dr. Lalchungnunga'n a vui a, hemi hnu hian Zarkawt thlanmualah phum a ni.

Larsap General Vijay Kumar Singh (Retd) chuan Lal Riliani chu vantlang tana a hnathawhte chu chhuanawm a tih thu sawiin a bikin zuk leh hmuam do kawnga a hmalakna chu hriatreng anih tawh tur thu a sawi.

Chief Minister Lalduhoma chuan Mizoten Nu ropui an chan niin a sawi a, hriselna kawnga mipuite zirtirtu ropui a nihna chu Mizo mipuite'n an theihnghilh dawn lo niin a sawi bawk.

'Pi Rii' tia hriat lar Lal Riliani hi Joseph Hranglura (L) leh Pi Anastasia Lalmawii (L) te inkarah kum 1943 January ni 24 khan Lungleiah a lo piang a. A pa chu Police Officer a nih avangin hmun hran hrana an awm kual hnuin Aizawla an awm ngheh hnuah Republic Vengah an inbengbel a. Hmeichhe Sikul (Presbyterian Church Girls’ School lo ni ta)-ah pawl 6 thleng a zir a. Govt. High School, Aizawl atangin matric a pass a ni. 

Kum 1963, July thlaah Aizawl DC Office-ah LDC hna a zawm a, kum 1967-ah UDC-ah a kaisang a, voluntary retirement-in 1991 khan DC Office-a a hna chu a chawlhsan ta a ni.

A pasal Lal Thanhawla chu politician a nih avangin motor luh lohna khuaah pawh kein a zui mai thin a, "A pasal thusawi hi ngun taka lo ngaithlain, a sawi sual leh a sawi hmaih te a hrilh leh Thin. Darkar 4 lai thu a sawi pawhin sawisel lovin a thu a, a thusawi a vêng a, a ngaithla uluk tluan chhuak zak thin. A campaign pui hnuhnung ber tumah phei chuan mawng belkâng khawpin a thusawi ngaithlain a thu," tiin vui programme a chanchin ziahnaah tarlan a ni.

Amah hi meizial zu mai pawh ni lo, vaihlo dengin a zial a, a zuar thin bawk a. 1989 khan thawhah (asthma) vangin Delhi-ah inentirin doctor chuan zuk leh hmuam vanga Mizo tawrhna nasat zia a lo hrilh a hemi atang hian Indian Society on Tobacco & Health, Mizoram Chapter chu a kaihhruaina hnuaiah 1989 khan din a a ni a. Indian Society on Tobacco & Health, Mizoram Chapter-a a hnathawh leh hriselna kawnga a rawngbawlna hian ngaihhlut a hlawh a, Most Valuable Contribution Towards Tobacco Control 2007, Lelte Woman of the Year 2011 leh Northeast Consultancy Services Special Citizen Award 2012 te pek a lo ni tawh a ni. 

Covid lockdown puan hnu lawk March ni 21, 2020 khan vawi 2 lai mild stroke a nei a, lung lampang harsatna a lo neih chhoh tâkah chuan September 2022 khan Max Multi-Speciality Hospital, Delhi-ah pacemaker vuah a ni ta a. Kum 2023 April thlaa Delhi-ah chuap infection a nei tih hriat a ni a, Max Multi-Speciality Hospital-ah enkawl a ni a. 2024 khan a natna hian zual lam a pan zel avangin doctorte râwn angin November thla khan Delhi lamah hruai a ni leh a, hetah hian chuap cancer an rinhlelh avangin Bronchoscope tih niin biopsy lâk niin cancer a ni lo hlauh a. Doctor te chuan tunhmaa mei a lo zûk ve thin chuan tun hnuah a chuap lamah harsatna a siam niin an sawi.

June 2025 thla tawp khan Civil Hospital, Aizawl ah admit niin July-ah Ebenezer Hospital-ah dahluh leh a ni a. November thla tawp atang khan hritlangin a rawn bawh a, a thawhah chhuak lehin December ni 1 khan Ebenezer Hospital-ah bawk admit a ni leh a. A tûk December ni 2 atangin ICU-ah dah luh a ni a, December ni 20, 9:00 AM khan a thi ta a ni.

Lal Riliani hian sawrkar hna a thawh chhungin Chairperson, Staff Welfare Association; Finance Secretary, All District Ministerial Staff Association, Mizoram leh Vice President, District Staff Association nihna te a chelh hman a. Heng bakah hian, President - Indian Society on Tobacco & Health (Mizoram Chapter); Executive Member - Mizoram State Tobacco Control Society; Member - Mizoram Cancer Society; Member - Executive Council, Indian Society on Tobacco & Health; Patron – MHIP; Senior Adviser - MHIP, Zarkawt Branch; YWCA of Aizawl Patron; Chief Adviser – MMEM; Chairperson - Board of Visitors, Protective Home; Committee Member - Mission Foundation Movement nihnate a chelh bawk.