ZALEN December 13, 2024 : Mizoram Congress chuan vawiin khan Congress Bhavan, Aizawl-ah Bhavan kharna leh Krismas Fellowship an nei a, he hun hi Mizoram Pradesh Congress Committee President Lal Thanzara leh AICC Congress Working Committee (CWC) member Dr. Lal Thanhawla ten hun an hmanpui.

MPCC President Lal Thanzara chuan, “Kan sawrkar-in upa zawk leh hriselna pan zawk ten hlim taka Krismas leh Kumthar an hman theih nan halpuah leh halmawi hal a khap hi Pu Lal Thanhawla hunlai atanga bultan a ni a, Aizawl mipui ten sawrkar thupek hi zawm theuh turin Congress party chuan kan sawm a ni,” tiin a sawi.

Lal Thanzara chuan, “Congress Party hi Pathianin ram hruai tura a kaihthawh loh chuan kan ram hi a rum thin a ni. Harsa taka kan lo sual chhuah, kan ram rohlu neihte hralh tum thu kan hria hi a lungchhiat tlak hle. Lengpui airport kan neih chhun pawh hi kum tharah hian Sawrkarin Indian Airforce kutah hlan an tum niin kan lo hria a, Mizoram mipuite tana a that dawn loh avangin keini Congress Party chuan kan do tlat a, he an thil tum hi ti lo hram turin kan ngen a ni."

"Indian Airforce te an inrawlhna airport-ah hian mipui an chep thei hle thin a. Sawrkar hna thawk te, mipui mimir sumdawng te, dam lo leh zirlai zin veivah zung zung ngaite tan tuna airport kan hman tangkai anga awlsama kan hman theih tawhloh kan hlauh avangin ZPM sawrkar hian Indian airforce hnenah hian hlan lo turin kan ngen a ni.”

Lal Thanzara chuan, “Krismas leh kum tharte hlim taka hmang turin Zoram mipui zawng zawng duhsakna ka hlan a ni,” a ti bawk.

Mizoram Chief Minister hlui leh CWC member Lal Thanhawla pawhin he hun hi a hmanpui a, Hawla chuan, “Tunah hian Politics a inlumlet nasa hle a. Eng hunah nge kan inthlan dawn a hriat loh a, inring renga awm mai tur a ni. Kum hluia kan kal dan te inenletin, kan tih dik lohte ngaihtuah zel a tul a, kum thara kan kaldan tur te ruahman a ngai a ni.”

Ex-CM Lal Thanhawla chuan, “Vawiina Krismas leh kumthar kan inbuatsaih lai hian ringtute tihduhdahna hi a la nasa hle a, India ram hmun hrang hranga kan Missionary te tawngtai pui an ngai hle. Sum leh paia tanpui thei lo te pawhin a aia ropui zawk, tawngtaipui hi kan ti thei a ni. Pathian hian hna a thawk zel a, Varanasi khaw thianghlimah pawh Ringtute kan zalen tlat a, Pathian hian thiltum a nei a, a thiltum kan hriat a, tihlawhtling turin kan taimak a ngai a. Kan party hian Pathian thiltum hre chunga kan kal hi a ngai hle a ni,” a ti bawk.