Aizawl March 18, 2023 : Congress chuan MNF adviser leh Minister ni bawk Lalchhandama Ralte in Lunglei Municipal Council Ward No.11 MNF Campaign Office hawnna  Zobawk a neihah March thla chhunga SEDP Second Instalment sem tum a nih thu leh Second Phase pawh kalpui nghal tur anga a sawi hi Model Code of Conduct bawhchhiatna chiang tak a ni an ti. 

Congress Party chuan March 16, 2023 khan Zonet JB Lunglei chuan hemi chungchang hi a puang an ti a, "Kohhrana rawngbawltu Upa atana thlantlin meuh ten politics a nih avanga sorkar dan palzut an hrehlo thin hi Mizoram politics tih chhiat zelna a nih avangin hetiang thil a thleng hi pawi kan ti hle. Lunglei Municipal Council inthlan tur pual hian March 2,2023 atang khan LMC huam chhungah Model Code of Conduct hi hman tan a ni tawh tih hre turin Minister Lalchhandama Ralte hi kan chah duh bawk," an ti.

MPCC thuchhuak chuan, "Lunglei Municipal Council (LMC) inthlan dawn a nih avanga dan bawhchhiatna a ni tih hre reng chunga hetiang thu Minister Pu Lalchhandama Ralte in MNF Campaign Office hawnnaa a sawi hi Lunglei mipuite zahlohna leh tham lohnaah Congress Party chuan a ngai a. MNF party in an intiamna cheng nuai thum pawh a pek theih loh laia tun LMC inthlan tura SEDP sem tur anga Minister meuhin a sawi hi zahthlak kan ti hle bawk a ni," tih an tarlang. 

Congress chuan, "Minister Lalchhandama Ralte in MNF Flagship Programme SEDP a rawn tawktarh dan hi  mipui rilru hruai sual pawisak lohna lian takah kan ngai a. Hetiang tawktarh tha lo leh thuneihna hmansual hi ram leh hnam hmelma a ni a. Lunglei mipuite pawhin he thil tha lo tak hi ring lo tur leh hnawl ngam turin kan ngen a. Rilru fim leh thianghlim taka anmahni enkawltu tur Councillor thlang turin kan ngen bawk a ni," an ti bawk.