Aizawl: MNF President Zoramthanga chuan, “MNF founder President Laldenga hi India ram mai ni lo, khawvel hriata Mizo hnamte min pholangtu a ni,” a ti. Nimin khan MNF dintu Laldenga thih champha tum 28-na a ni a, hemi pual hian a thlan, Treasury Square-ah hun hman a ni. MNF President Zoramthanga chuan thu sawiin, “Pathianin Mizote hi hnam, sakhua leh ram min pe a, hemi humhalh tlat duhna leh hmangaihna thinlung Zofatea a tuh hi a ropui tak zet a, hnam tana mi ropui, hnam thinlung mipuitea tuhtu hi hnam dang pawhin neih ve an duh a, duh avanga neih ve ngawt theih erawh a ni lo a ni,” a ti a. Mizo hnam leh Mizoram a awm chhung chuan a hming a daih tawh loh tur thu a sawi bawk. Laldenga nupui, Lalbiakdiki pawhin thu sawiin, “Tun thleng pawha ka pasalin chawimawi a la hlawh hi a fel vang ni lovin Zoram tana a hnathawhte hriatreng a nih vang a ni a. A thiha central sawrkar ruahmannaa State Funeral nena ropui taka helai hmuna vuiliam a ni pawh kha Zoram leh hnam tana a hnathawh vete avanga chawimawina a ni a. A mimalin engmah ni lo mah se, miin a hnathawh ve te pawm a, an chawimawi hi a ropui ka ti,” a ti. MNF dintu Laldenga hi July 11, 1927-ah Lunglei Pukpui khuaah a piang a, kum 1944-ah British Indian Army a zawm a, kum 1959-ah Mizo National Famine Front chu a hova din niin, chu pawl chu October 22, 1961-ah Mizo National Front (MNF) tiin thlak a ni. Kum 1990 khan Cancer a nih hriatchhuah a ni a, Memorial Sloan Kettering Cancer Centre, USA-ah thla thum enkawl a nih hnuin Mizoram pana an haw kawng Ashford Hospital, London-ah July 7, 1990, India sanaa tlai dar 2:30-ah a thi. A ruang hi July 11, 1990 tlai dar 4:30-ah Tuirial Airfield-ah helicopter-in phurh thlen a ni a, July 13-ah vui niin, Mizote zinga state funeral-a vui awm chhun a la ni.