Aizawl February 17, 2023:  Zirtawpni hian Mizo Hnam Runah chhung inkhawmna neih a ni a, he huna thusawitu MNF Genenetal Hqr. Adviser Col. Lalrawnliana chuan, "Laldenga kha ramhruaitu tura Pathian ruat a ni, tiin Lalnunmawia Diary-a thu ziak tam tak chu a dik tawk lo leh MNF tana chhiatna tur awm lo," tiin a sawi.

MNF Adviser Rawna chuan, "Ramhnuai sawrkarah khan Pu Lalnunmawia kha Vice President niin a fel em em a, amaherawh chu Pathian leh kan Ram tan, tihah hian famkim lohna lian deuh a nei a, mipui thinlung kha a nei thei tlat lo a ni. MNF mipuite khan Pu Lalnunmawia kha a nungchang atang khan hruaituah kan pawm thei tlat lo a, Chin hills beih pawh ama rawt chhuah a ni. Pu Denga phei chuan, A  thenin kan vah laiin a thenin min hal khum a, a ti nghe nghe a  ni," a ti.

Col. Lalrawnliana chuan, "Lalnunmawia Diary lo chhuah atanga tuten emaw thu dik lo an vaivir hi a tha lo a, thudik zawk hi mipuiten kan hriat zel a tha a ni. Lalnunmawia'n a diary-a a ziah lan kum 1969 leh 1971 vela mi te chu a tha em em a, a tluang tlam tha, amaherawh chu, a hmun leh hun te ziah sual a ngah em em tih sawiin, keima chanchin ngei pawh a ziak dik lo a, MNF party tan chhiatna tur a awm lo a ni," a ti.

Rawna chuan, "MNF Dumpawl lo chhuah dan leh Pu Bualhranga te ho a dumpawl an nih chhan hi Pastor Zairema atanga intan a ni a, Cabinet-ho nen intiam rualin India biak an duh. Mahse, Pu Denga khan political status min pek hun a ni lo, a ti a. Nimahsela, anni ho khan biak an tum tlat si a, khang hunlaia India biak kha thil tih chi-ah a ngai lo a. East Pakistan lak an tum tawh avangin inbiakna atan khan hun tha a ni lo tih Pu Denga khan a hrechiang a ni. Kan ralthuam dahtira min biak an tum a, mutual agreement-te siamin anmahni duh danin camp-a min khungbet a, Naga-ho an tihdan a min tih an tum a ni. Hei hi kan hotuten an duh si lova, Pu Denga kha a chhe thei ang berin an chhuah a, ‘Pu Laldenga hi biak tlak a ni lo’ tih te chanchinbu leh Radio-ah thu an chhuah a. Chutih laiin capital lamah Pu Denga beihna thu a tam em em a, khang kha kan hruaitu thenkhat ten India role-play a ni, tih an hriatthiam loh vang a ni," a ti. 

Ramhnuaia MNF sipai hotu hlui chuan, "Khatia kan buailai tak khan Pu Zoramthanga leh Pu Tawnluia te Jail tang lo chhuak kha rawn langin Pu Denga an rawn thlawpa, felfai takin hun kan hmang chho ta a ni," a ti.

Col.Lalrawnliana chuan, "MNF party hi famkim kan ni bik lo a, amaherawh chu rinawm takin kan kal zel dawn a. Hripui leng kara kan hotuten ram an hruaina hi a tha a, an rintlak a, inthlan leh hunah pawh hnehna kan chan leh ngei ring tlat ang u," a ti bawk.