Tunlaiin Mizoram leh Assam ramri fello chinfel theihna kawng a nih ringin  MZP chuan Zophai, Bairabi bula, Mizoram Chief Minister hmasa ber Pu Ch.Chhunga (RIP) ram, a nupui Pi Rothangi’n a pek hmunah  MZP chuan “Zofate Chawlhbuk” sak an tum thu a buaina chhuak chungchangah Mizoram leh India sawrkar ten Remna zawnga in biakna an neih laia, MNF palai ten Ramri chung chang an rawn sawi tello anga Thuchhuah leh Social Media lama lo lang thin hi sawi fiah tulin ka hria a. Indian Express a Ramindar Singh thuziak hian a tihfiah theih ka ring. “Mizo National Front hruaitu Mr. Laldenga chuan Mizoram zau tak a phut a. Tripura, Manipur leh Assam tea Mizote luah chin ram hlawm zau tak chu Mizoram a rin luh a phut a. Mizoram himna tur leh ram neitu nihna Parliament  pawhin a khawih danglam mai theih loh tur Constitution ti danglam a Constitution Safeguard a phut na hle bawk a ni. “Mizo mipuiten thlamuang taka vote  an thlak theih lohna India sipaiten Lailungdawt a an hnunga an tin reng chunga inthlanna hi Free & Fair Election a ni lova thianghlim lova din  sawrkar bantir tura a nawrna chu a la bansan chuang lova. Mizoram Statehood neihna tur Constitution siam thatna nemngheh a nih hma chu sawrkar dan lova din chu thiata Interim sawrkar din nise a ti bawk a ni. “Burma ram chhunga MNF Headquarters kea hun rei tak kal ngaia a kal hnua a lo kir leh hnuah kan kawm a. ‘Constitution dai chu nasa takin thiat kan tum lo ve,’ a ti a. Kum 15 a hel hnuah MNF Executive Committee  chuan India nen inbiak remna tur kawng zawh phalna thu kengin a  lo kir leh a ni. Manipur, Tripura leh Assam ram te theuhva ram zau tak sahthlak a Mizoram a rinluh a phutna chuan, a thenawm  state-te atanga dodalna nasa tak chawkchhuak dawn mahse, British-in kum zabi 19-na chhunga an awpa an ram an thendarh hma zawng khan heng ramte hi Mizote ram ani a ti a, Mizorama lakir leh turin Laldenga chuan a kar khauh hle a ni. Mizoram inpumkhatna kan sawi hian tuna Mizoram piah lam ramte hi kan sawi tel thin a ni an ti. India sawrkar hnenah hian heng ramte hi rorelna pakhat hnuaia dah turin kan ngen dawn a ni. Hei hian State siam danglamna State Re-Organisation an tih chu a rawn hring dawn a ni. Chuchuan hun pawh a duh rei deuh thei a, Mahse, India ram chhungah Mizote rorelna pakhat hnuaia dah khawm chu a dikin tih ngei tur  a ni tlat si a ni,” a ti a. Heng thenawm ram a chuh mek chhungah hian Mizoram mihring awm chanve lai an awm a ni. Tun hi heng ram bung kan chan takte  neih let tura chinfel nan hun  tha ber a ni a ti bawk. Mizoram deptu Burma ram Square Kilometre 10,000 a zau chu an pi leh pu te lo chenna thin Chin Hills mihring nuai 7 vel awmna chu Mizote ram a ni a ti bawk. Mahse, hei hi chu a thil ngiat pahnihnaah a dah a. Nakina India sawrkar leh Burma sawrkar te la chinfel tur a ni a ti a. Insawiremna tur atana thil phutte Prime Minister hnena a pharh hma a lo puanzar vak chu a rem lo va, Sailova sawrkar thlak nana Interim sawrkar din turte, Article 371(A) hnuaia Nagaland an pek aia sang Mizoram dinhmun tur an kar dawn  tih a sawi duh chauh a ni. Constitution leh Politics thil pawmpui tura an nawr turte bakah, Economic lam leh khawtlang nuna an hnufualna phurukna tur Economics Aid tam tham tak a ngiat tur thu te, Ramhnuai atanga lo kirte chhawmdawlna turte a phut dawn tih a sawi bawk. Mizote hi danglam tak an nihzia Laldenga hian a sawi uar hle a. Thlahtu lamah leh nunphung-ah Mongolian chhungkua a mi an ni a, Sakhuanaah Kristian an ni. Nangni chu Indo Aryian in ni a, tiin a sawi a. Hindu nuna nung leh Hindu ngaihtuah dana ngaihtuah in ni a. Heng hian kar min siam a ni tiin a sawi a. India mi kan nihna chu kan ti lang thei e; mahse, inthinhrikna kan nei tawn ve ve si. India nihnaah hian Mizote him lova inhriatna kan nei a. Kan hlauhna emaw,  him tawk lova kan inhriatna emaw hi a chhanchu suangtuahna mai vang a ni thei a; mahse, kan hlau miau si a ni. Kan chhungrilah hian hlauhna chu a riak renga, chu chu a ni Constitution ngeia invenhimna  kan duhna chhan chu tiin a sawi. Laldenga chuan Constitutiona invenhimna chu a tak a lang thei ni se, chhunglam ngaihtuahna nen pawha inzawm a ni tur a ni,” a ti. Mizo Inremna (Accord) bung 11-naah khan ti hian a in ziaka “MNF Paliten State danga Mizote luah ramte nen rorelna pakhata siam tura inzawmkhawm an rawt a.  India Sawrkar aiawhte chuan India Danpui Article-3 nain a tihdan phung tur an sawi chhuak a,  Amaherawhchu hemi chungchang thuah hian sawrkar chuan eng intiamna mah a siam thei lo,” tiin. (The Question of unification  of Mizo inhabited area of other States to form one administrative unit was raised by the MNF delagation. It was pointed out to them, on behalf of the Government of India, that Article 3 of the Constitution of India describe the procedure in this regard but that the Government cannot make any commitment in this respect) Pu Laldenga’n ka bula a sawi dan chuan “ Mizote rorelna pakhat hnuaia awm leh kan ramri chungchang fel lo te siam that nise tiin kan nawr nasa hle a. Atir chuan India sawrkar chuan min hnial ngaihna vak pawh an hre lova, mahse, thenawm State dang atanga dodalna nasa tak an tawh theih tur thute an sawi a. Kan inbiakna pawhin a khaihlak phah renga. A hnu deuha kan sawiho leh naah chuan India Palaite chuan ti hian an sawi ta a, “State ramri thu leh State Re-Organisation thu hi Constitution Article 3-naah chiang takin tarlan a ni a. Central sawrkarin heti chin hi, hemi State-ah hian bet sela tia thu tawp siam mai thei kan ni lova, State leh State aiawhte sawi rem tur a ni a, tuna kan inbiaknaah hian sawifel kan tum a nih chuan kan inbiaknaah hian inthenawm State aiawhte an tel ve a ngai dawn a, in duhdan kha inthenawm State-te duhdan nen a inmil mai thei dawnin a lang lo va, kan inbiakna hian tawpintai a nei dawn lo va. In mipuiten remna an nghakhlel tawh hle si a, heng thu hi chu inrem hnuah pawh la sawi leh theih tho a ni a, tiin tan an khawh ta a. Hetih lai hian kan mipuiten “Remna chu engpawhnise kan pawm ang, Sazuk, Sakhi pawh rawn hawn ula kan lungawi ang” tiin Kohhran, NGO leh Political Party zawng zawng ten min au si a, rilru khingbai tak chungin tuna remna hi kan rawn sirtlukpui ta a ni,” a ti.Indian Express 7th, April 1981, Ramindar Singh - Retold by Zosangliana (Zotea)