Aizawl October 25, 2023 : Vawiina thuthar thehdarhtute an kawm naah MNF chuan ZPM Chief Ministerial candidate Lalduhoma chu damlo kanna RTI chhanna a damlo sum a pek tarlan zat ang he damlo hnenah hian a rang lama pe turin an ti.

Lalduhoma fund hmanna Lalthanmawia Hauzel, New Serchhip-in RTI hmanga a dilna chhanna December ni 22, 2022-a a lan danah chuan, Lalduhoma hian Zoremsangi, Serchhip Dinthar W/o H Zoramsiama chu ‘Grant in aid for Health Purpose’ atan Rs 2,50,000/- (nuai hnih singnga) a pe angin a inziak a ni.

MNF chuan, "Lalduhoma’n cheng nuai hnih singnga (2,50,000/-) pe anga ziah, Zoremsangi hnenah hian Lalduhoma hian Rs 1000/- dam lo kanna chiah a pe a. He thu hi Zoremsangi pasal H Zoramsiama pawhin nemnghetin Lalduhoma hian Zoremsangi hi Rs 1000 bak a pek loh thu a sawi a, an ti a. Zoremsangi pawhin Serchhip MNF hruaitute hnenah Duhoma hian Rs. 2,50,000/- a pek loh thu hi a sawi bawk a ni," an ti.

MNF chuan, "ZPM Chief Ministerial Candidate Lalduhoma’n a biala dam lo a kanna tur Rs 2,49,000/- a tham then sak duh mai hi mak kan ti hle a. MLA zin loh bill a lak, mipuiin a eiruk kan hriatchhuah tak avanga a kir leh ang khan, he dam lo kanna sum a lo chheprelh hi a dam lo kan tur Zoremsangi hi pe vat turin kan ngen a ni," an ti.

7.9.2023 khan MNF hian Aizawl Press Club-ah Lalduhoma’n MLA fund a hman dan chungchang an lo sawi tawh a. Kha mi tum khan Lalduhoma hian a MLA fund atang hian 2021 - 2022 (kum 2) chhung lek hian dam lo kan nan cheng 16,42,000/- (nuai sawm paruk chuang) a hmang tih an sawi. Lalduhoma’n dam lo kanna atana a sum hman hi a dik ngei em tih kan chhui zui a, thil dik lo inphum a lo awm ngei tih an hrechhuak ta niin an sawi.

Zoremsangi pasal H. Zoramsiama hi Serchhip Dinthar, ZPM Village Council President ni lai a ni. Zoremsangi hi tunah chuan a hriselna te pawh a lo tha ta a, kan lawmpui hle a ni.