Pu Lalhmachhuana Zofa lehkhabu ziah, Mizo History 'Khua' tih chu vawiin khan Pu Robert Romawia Royte, Minister chuan a office-ah a tlangzarh. He lehkhabu hi Pu Lalhmachhuana Zofa lehkhabu tihchhuah 157-na a ni a, tun dinhmunah Mizo zinga lehkhabu tichhuak hnem ber nia tarlan a ni. 

He lehkhabuah hian kum 1900 hma lama Zofa chi peng hrang hrangte lo awm tawhna khaw langsar bik deuhte thlang chhuakin tarlan a ni a, India, Myanmar, Bangladesh-a kum 1900 AD hma lama khaw langsar deuhte chanchin kimchang takin a chuang a ni. Kum 1900 hma lama khaw 700 chuang chanchin ziah lan a ni. 

Lehkhabu tlangzarh inkhawmah hian Rev. R. Laldika'n hunserh a hmang a, Pu Michael Lalthanmawia, ZORO History Committee Chairman-in lehkhabu thlirlawkna a nei. K. Lalthlamuankimi, Youth Icon chuan Pu Lalhmachhuana Zofa hla phuah, 'Ih Maw Duhlai' tih chu thiam takin a sa bawk.

Pu Robert Romawia chuan chuan, "Lehkhabu hi tlang hrang hranga chi leh kuang khatte min hûi khawm a, min tipumkhat theitu a ni. Khawvel huapah pawh hnam anga rual kan pawlna atan leh hriatna leh thiamna zau zawk kan neih theih nan Mizote hian lehkhabu kan chhiar tam a tul a ni," a ti. Lehkhabu ziaktu Pu Lalhmachhuana Zofa chu a kal leh zelna turah duhsakna a hlan bawk.