Aizawl February 24, 2023: Zirtawpni hian Mizo Hnam Run chhung inkhawm thusawitu Adviser to Chief Minister Er.K.Lalsawmvela (Technical) chuan 'Lalnunmawia Diary' chu MNF tan chhiatna leh pawina a awm loh thu a sawi a. He Diary hi a lar thar hle a, opposition party-ten an phur pui hle, a ti. Lalnunmawia chu Laldenga paihthlak tuma beitute zingami niin a sawi a. Diary ni si a, lehkhabu rawn a ngah avangin hian thu dang belh a tam hle niin a sawi.

Er. K. sawmvela chuan, "Ram hnuai sawrkarah khan President chu amahin a bang emaw, a thi emaw anih loh chuan thla 6 hnuah Vice President chu President-ah thlan a ni ang tih chauh a ni. Pu Lalnunmawia Vice President ni si kha, a lehkha chhhuahah President tiin a inziak thin a, President tiin lehkha pawh a hnen a thlentir thin. Pu Denga kha tlanbo a ni lo a, a awm loh laia President leh Vice President lo thlan theihna dan kha a awm lo. Parliament khan Pu Nunmawia thil tihdan dik loh avangin Vice President atangin an paih ta a ni," a ti.

Er. Sawmvela chuan, "Pu Denga dam laia ziak ngam si lo, a thih tawh hnua duh dan dana lo ziah kawi hi a dawihzep thlak a, a pawi hle. Ram tana kan Hnam pasalthate khan a derin nunna an chan lo, Independence sual sawi bawrhbangtute hi nakinah thang tharten an la dem ang. MNF hi Hnam thuthlung kengtu, hming la thlak ve ngai lo a ni a, party dang ten sawi chhe thin mah se, a kal zel dawn a ni," a ti.