October 20, 2023; Lalpa Chhiahhlawh Intelkhawm te chu bial 22 ah ding turin an inbuatsaih a, nimin atang khan Zoram Thar kaihruaina hnuaia independent a ding tur dang ten nomination an file, an zinga mite ngaihven hlawh ber chu chief minister khing tur Nl Lalruatfeli Hlawndo a ni.

Nimin tlai khan Nl. Lalruatfeli Hlawndo chuan Aizawl North I RO hmaah thutiam lain Assembly Election ah Aizawl North I biala Lal Isua Krista tana BAWM hung turin a in ziak fel a, he bial ah hian ZPM atangin bialtu MLA ni mek Vanlalhlana, MNF atangin cabinet minister term li (4) ni thei leh hetiang dinhmun ni thei la awm chhun R. Lalzirliana, chief secretary hlui IAS retd. Lalnunmawia Chuaungo (INC) te nen an inkhing dawn a.

Nl. Lalruatfeli Hlawndo hian Nilaini tlai khan Aizawl East 1 ah nomination a lo file tawh bawk, East I hi chief minister Zoramthanga bial niin, he bialah hian ZPM atangin Lalthansanga (Chatea), INC atangin Lalsanglura Ralte te chu ding tur langsar an ni.

An hruaitu Rev. Dr. Zaichhawna Hlawndo chuan tun tum inthlan ah hian Pathian Lal Ram sawrkar dinna turin Lalpa Chhiahlawh Intelkhawmten Zungbun/RING symbol ah hmangin bawm an hung dawn a ni a ti a. Mipuite inti Thianghlima vote thlak vek turin a ngen bawk.