ZALEN, Mar. 29, 2025: Mizoram Snooker & Billiards Association (MSBA) buatsaih, Mizoram State 9 Ball Pool Championship 2024-2025-ah Mizo zinga hlawhtling bera chhal ngam, Lalrina Renthlei bawk a champion leh ta.

Inrinni tlaia MSBA Hall, Hawla Indoor Stadium, Republic Vengthlang, Aizawla final-ah hian Tuikhuahtlang, Aizawl tlangval hian amah ang bawka tawnhriat nei tha, Zonuntluanga (Tekawka) chu 9-8-a hnehin nomawi a la a ni.

February thla maia Mizoram State Snooker championship 2024-25 champion hlim, Lalrina leh Mizoram Snooker Ranking Championship 2019 leh Mizoram Snooker Championship 2018 nomawi lo la tawh, Tekawka te inkhel hi race to 9 (frame kua la hmasa sa chak)-a khelh a ni a, an inhnehtawk tak zet.

Frame inlak chhawk zak zakin 8-8 thlengin kal fal an awm thei lo va, a tawpah ram pawn thleng pawha lo feh chhuak tawh leh India aiawha lo khel tawh, Lalrina chu a chungnung zawkah a chang ta hram a ni.

Thawhtanni atanga khelh tan MSBA buatsaih inelna hian Mizoram hmun hrang hrang atangin player 75 an tel a, Aizawl bakah Lunglei leh Champhai atangin pahnih ve ve, Seling atangin 11 leh Sihphir atangin eng emaw zat an inlan.

Champion nomawi hawntu, Lalrina hi MSBA-in tun hnaia inelna an buatsaihah a chungnung hle a. February thlaa a lo champion tawh bakah November khan Mizoram Snooker 6 Red Championship 2024-2025-ah leh May thla khan Mizoram State 9 Ball Pool Ranking 2024-2025-ah a lo champion tawh.

December thla khan Asian 10 Ball Pool Championship 2024-ah India aiawhin a inlan a. August thla khan JOY Heyball International Open Thailand Stop 2024-a a inlan bakah June thla khan Maldives Open 2024-a a lo khel tawh bawk.

MSBA hian Hawla Indoor Stadium-a an hall hi Pathianni tih loh ni tin chawhnu dar 02:00 atanga zan dar 10:00 thleng Rs. 100 chawiin a inkhelh theihin an hawng a, a duh apiang khelh an phalsak.