JOY Heyball International Open Thailand Stop 2024 khelh mekah Mizoram Snooker & Billairds Assocaition (MSBA) player, Mizo tlangval Lalrina Renthlei chu inlanin Round of 32 a inhlang kai.

Thawhtanni atanga khelh tan inelnaah hian round of double elimination group stage-ah Mizo tlangval hian Malaysia player Loh HaO Juan leh Singapore player Zhong Wei Tan te hnehin knock out round a lut.

Round of 64-ah hian Singapore player tha, Darren Young chu deciding-ah a hawlh thla zui a. Round of 32-ah Thailand national player Tawan Pooltong chu Inrinni khan decider frame-ah hneh lovin pre-quarter final a lut zo ta lo a ni.

Tuikhuahtlang, Aizawla cheng, Lalrina chuan, “Heyball hrim hrim hi ka vawi khat khelhna a ni a, India ramah kan la khel ve ngai lo hrim hrim a ni,” tiin inelna a hmachhawn chungchang a sawi.

Dawhkana ball hawlh hmanga intihsiakna chi khat, heyball hi English pool table-ah American pool ball lian hmanga khelh chi a ni a, cue sports zinga hmasawn chak ber pawl a ni a, South East Asian Games leh Asian Games-ah te pawh telh a ni tawh a. Olympic Games 2032 Australia-ah pawh telh beiseina a sang hle bawk.

Basketball-ah pawh Mizo player zinga hriat hlawh ber pawl ni phak, Lalrina hi MSBA player pawimawh leh joint secretary ni lai a ni.