Aizawl March 23, 2023 : LMC inthlan lo awm turah Chanmari Campaign office hawnna neih pahin vawiin khan Congress party chuan Street campaign an nei a, MPCC President Lalsawta chuan LMC pawimawhna sawiin, "LMC-ah hian a pawimawh ber chu thuneihna sem zai a ni. Aizawl a thuneihna a awmkhawm tlat mai hi Municipal hmanga tihdanglam a ni tawh dawn. Lunglei khawpui hi a tul angin mahniin a inenkawl tawh ang a, sum lakkhawm dan turte pawh ruahman a ni," a ti.

Lunglei by pass road chungchang sawiin, "Tuna kan sawrkar hrawn mekin Lunglei by pass road, Congress sawrkarin kan ngaih pawimawh avanga bul tan nan cheng nuai sangkhat kan dah chu an ngaih pawimawh loh avangin thil dangah an hmang peng a, a pawi kan ti. Lunglei khawpui thang zelah Tui lamah harsatnate pawh kan tawk chho zel dawn niin a lang a. Congress party chuan hei hi kan ngai pawimawh em em a, Lunglei khawpui hi tui hnianghnar zawka pek kan tum a ni. Congress Party chuan khawpuia mi rethei awmte tan ruahmanna tha tak, Urban Employment Guarantee Scheme kan siam a ni,"  a ti bawk.

MPCC President chuan Old pension scheme chungchang sawiin, "Sawrkar hnathawkte hi an pawimawh em em a, hlawh an lak theih loh hian mipui mai nilo kohhrante thlengin kan tuar thin. Tunhnaiah sawrkar hnathawk rilru hliam sak zawnga thu sawi an awm a. Hei hi a dik lo! Chief Minister, Minister leh MLA-te hi langsar takin intlar thup mahse, a taka sawrkar mawhphurhna hlen chhuaktu chu sawrkar hnathawkte an ni. An tan hian Old Pension Scheme pawh hi kal pui hi an phu hliah hliah a ni," a ti bawk.

Sum hmanga mi lei ching chungchang a sawinaah Lalsawta chuan,"Mihringah lei theih pahnih an awm. Chu chu Bawih leh Nawhchizuarte an ni. Inthlan dawna Bawih leh Nawhchizuar ang leka min ngaia min lei tumtute hian rawn lei an tum che u a nih chuan hawihhawmna tel miah lovin lo ti zak rawh u. Misualte lakah hawihhawm a ngai lo. Mizote hi chhan tlak kan la awm. Mizoram hmasawnna lian thamte hi Congress sulhnu deuh vek a ni tihte hi min hriat sak ve rawh u," a ti bawk.

Lalsawta hian Lunglei pa langsar tak tak mual liam tawh te hming a lam a, "Anni hian an thlarauin min rawn thlir ve se, Lunglei hma khua thlir a ngaihtuahna lo seng tu Chhimbial chhantute pawh hian an duh zawng zawng famkim lo mah se, tunah hian an duh ang chu a thleng ve ngeiin a rinawm," a ti bawk.