Aizawl October 10, 2022 : Mizo Hnam Run chhung inkhawm neihah Rajya Sabha MP K.Vanlalvena chuan," Hripuiin kum 2 chuang zet min nuai a, chuvangin sawrkar hmaa kan intiam kha engemaw zat tih theih lohin a awm a, hripui len vanga kan intiamna kan tih theih rih lohah mipui hriatthiamna kan dil a ni. MNF hian nakum kum tawp inthlanah sawrkar leh ngei kan tum a, party worker te kan thiam tawk leh theih tawk ang theuhin hma kan la ang a, Pathian leh mipui zarah kan sawrkar leh ngei dawn a ni," a ti.

K.Vanlalvena, NCC MNF general headquarters chuan, "Sawrkar hmaa ram hmangaih hlur a, sokar hnua chhung leh khat ringawt hmangaih hi Pathian leh mipui duh loh zawng a ni a, MNF chuan kan ti ve thiang lo,"  a ti a. Kum 2018-a MNF sawrkar chhan sawiin, "Congress sorkar zu zawrh kha mipui leh kohhranin an ning hle a, kan sorkar chuan kan titawp ang kan ti a, kan sawrkar a, kan titawp nghal. SEDP kha kuthnathawktute dawmkan nan kan aupui nasa hle bawk a, hripui vangin kan duh angin kan kalpui mai thei lo a, tunah hian a tahtawlin kan kal pui mek zel a ni."

"Kum 2018-a hmun tina kan MLA candidate-te kha a mimal ang theuh pawhin an tha em em vek a. Congress sawrkar kha Mizo Nationalism-ah ke a pen meuh lo a, hnam humhalhna kawngah hma a la meuh lo. Congress leader Pu Hawla leh kan leader Pu Zoramthanga kha mipuiin an khaikhin a, Pu Zoramthanga chu tawngtai reng mi, Pathian tih mi a ni tih mipuiin an hria. Congress Vice President leh MLA huhang ngah tak inthlan dawnah an lo lut a, Pu Robert Romawia Royte a lo lut bawk a, khang te kha kan sawrkar chhan pakhat a ni," a ti bawk.

Rajya Sabha MP chuan,"Lalthutthlenga min dahtu Pathian rawn chung zelin kan level theuhah kal i la, kan sawrkar leh ngei ang. Pathian duh dan lova thil kan tih chuan min hnuk hniam ang. Kan work order, supply order leh hna lakah te hian tawngtaina nen Pathian rawn zel i la, kan sawrkar leh em em ang. Kan hna inpek danah te hian a petuin chanvo neih ve phet lo tum hi Pathian duh loh zawng a ni bawk. Pathian leh kan ram tan titu kan nih angin engkimah Pathian dah lal ber zel ang u. ZPM hruaitute hian an sawrkar tur thu an puang dum dum a, an la sawrkar miah lo. Sawrkar leh kar loh chu puan vak vak aiin Pathian thu a ni zawk," a ti bawk.