ZALEN January 14, 2026: Thla 32 chhung ngaihven an nih tawk loa an inhriat avangin Kuki-Zo Council hnuaia Indigenous Tribal Leaders’ Forum (ITLF) chuan vawiin khan Lamka tia hriat bawk Churachanpur-ah mipui kawngzawh an buatsaih a. He huna resolution an pass zingah Union Territory neih an phutna chu a langsar ber a. KZC leh ILTF te hian an resolution hi Churachanpur DC-ah an thehlut nghal a ni.

He hunah hian SoO Groups, KZC leh Members of Legislative Assembly (MLAs) aiawh te pawh an tel a, September 2023-a rorelna hran neih an duh thu an lo rel tawh ang te chu sawichhuah leh a ni a, mipui ten kumpui lingleta harsatna an tawh dan te pawh sawichhuah a ni. ITLF chuan May, 2023 atang khan Imphal Valley-a cheng, Meitei leh tlangram district-a cheng, Kuki-Zo inkara buainain a tuam mek a. Tharum thawhna thlengah mi 260 chuang thiin mi 60,000 dawn chenna in chhuahsana tlanchhia an awm phah.

Resolution an pass zingah hian rorelna hran nei tura Union Territory pek an phut thu an tarlang a, Central sawrkar chu Union Territory an dilna chinfel theih chin tipuitling tur leh rorelna hran an neih theihna tura hmala turin an ti a, an ram humhimna tur leh neitu nihna an neih theihna tura hma la turin an ngen.

Kuki-Zo hnam hian President’s Rule hlih a nih hnua sorkar awm leh turin an tihsak hmasak tura an duh an tar lang bawk a. Sawrkar thar hian ziakin danpui hnuaia UT kan neihna tur an dah ngei tur a ni a. An intiamna hian hun tiam neiin, tuna assembly hun chhung (kum 2027 tir thla thum) chhunga tihhlawhtlin turin ziah kan phut bawk, an ti.

Politic hmanga an thil phut tih theih ti tura state sawrkar leh sawrkar laipui intiamna a awm loh chuan Kuki-Zo pawl leh MLA-te chu Manipur-a thlan chhuah sorkar siamna turah an tel ve dawn lo tih an sawi bawk.

Kalkhawmte chuan 2027-a Manipur General Election neih a nih hma ngeiin Kuki-Zo mipuite ngenna chinfel theih chin chu chinfel sak turin an ngen.

Kawngzawh hi Sielmat Ground leh Koite Ground atangin tan a ni a, Peace Ground-ah intawkkhawmin; khawtlang hruaitute'n thu an sawi a. Kawngzawh chhung hian Kawngpui dunga sikul, in leh dawr hrang hrangte chu khar vek a ni.