Aizawl May 12, 2023 : Lamka journalist te chuan national media ten Manipur chungchanga inbeihna chungchanga report tam tak chu thu dik tawk lo an ti a, Internet lamah harsatna an tawk tih sawiin, Chief Minister N. Biren Singh-an tualchhung buaina chungchang a sawi pawh a dik tawk lo an ti bawk.

May ni 12 a Aizawl Press Club-a MJA te nen an inkawm naah Lamka Chanchinbumi te chuan Churachanpur district-ah internet an neih loh avang leh print-ah pawh an mamawh hmanrua an hmuh theih loh avangin thudik puanchhuahna kawngah harsatna an tawk tih an sawi. Hetih laiin Meitei journalist te chuan internet an access thei a. District administration office atang ten national media lamah chanchinthar an thawn thei bik an ti a. Anni chu hman phalsak an ni ve lo niin an sawi.

Zohnahthlak journalist te'n internet neih loh vangin thuthar tichhuak thei lo, Meitei lamin an nei bik anga an sawi pawh hi a dik niin a ngaih thei a, nimin lam pawh khan Imphal atanga Chanchinbu tihchhuah tam ber Sangai Express pawh online atangin la en theih reng a ni.

Chief Minister Biren an nundan phung pangaia awm tawh anga a sawi leh hmun thenkhata erawh curfew puan a la nih thu a sawi pawh dawt an ti a, A chhungah chuan inkahna a la thleng reng niin an sawi.

Buaina chhuah ni, May 3, 2023 atang khan Sikul khar vek a la nih avanga zirna a kal thei lo a, pawl 10 leh 12 zirlai an khawngaihthlak hle an ti a, Mizoram lama zirna chhunzawm dan te dappui turin Chief Minister Zoramthanga ngen an tum thu an sawi. 

Buaina lo chhuah tan dan

ATSUM chuan May 3, 2023 khan Tribal Solidarity March chu a huaihawt a, hei hi Meitei/Meetei ten Scheduled Tribe list of Constitution hnuaia tribal nih tuma registration neih an tum duh loh lantirna a ni.

May 2, 2023 zan Dar 6 vel khan Meitei Leepun te chuan democratic taka tribal ten rally an siam chu tibuaiin kawng leh highway-ah te 'Counter Blackade' tlangram chinah a kalpui chhun dar 12:30 velah an zo a, tlai lam Dar 2:00 velah an haw lam chu Metei lam hian an lo tibuai a, buaina a chhuak tan.

Biak In 222 tihchhiat a ni an ti a, heng zingah hian Imphal phairuam-a Meitei Christian Biakin 150 pawh hal leh tihchhiat zingah hian a tel tih an sawi bawk.