ZALEN Oct. 14, 2025 : Lammual a International Star Expo neih mek chungchangah social media-ah te thu dik ziktluak lo hrang hrang a leng mek nia an hriat thu leh pawi an tih thu sawiin, Mizo stall chhangtu ten thil awmdan an sawifiah.

Vendor te thuchhuaha tarlan anih danin, he Star Expo hi permission felfai tak neihna hnuaia organise niin, Mizo vendor hi mi 15 an awm tih an tarlang a. An thuchhuahah chuan hetianga kan Mizo puite ngeiin kan product te phochhuah theihna hmun ṭha tak min siam hi kan lawmin, a buatsaihtute chungah pawh lawmthu kan sawi tak meuh a ni, an ti a. Mizoram hi mahni dehchhuahin kan la in manage zo lo tak zet a. State dangte thilsiamchhuah leh thar chhuah hmanga la nung ve mai kan ni a. Mipuiten helaia kan lei phak loh leh kan hmuh ngai lohte man man zawk a kan lei theih tura phochhuahna hmun ṭha a awm hi a lawmawm kan tiin mipui tam takte pawhin an mamawh an rawn lam khawm hi a hlu kan ti tak zet a ni, an ti bawk.

State pawn atanga rawn kal te hi temporary ILP nei vek a rawn lut an ni tih sawiin, an ILP valid lo tawp hman te an lo awm a, ILP nei miah lova lo lut an awm lo tih hi kan hrechiang ve a. ILP pawh an man ni ah vek hian an renew a, a tukah an ILP valid a rawn thleng leh vek a. Mimal taka inbeih duhna a ang dawn dawnin a lang a, hetiang hi thleng tawh lo se kan duh hle a ni, an ti.

Permission fel tak leh No Objection Certificate neih ngaite nei fel veka organise niin, State pawn aṭanga Vendor te pawhin tunah hian Casual Taxable Person registration tiin tun Trade Expo atana temporary Trade license an nei a, GST pawh Taxation Dept ah chhun luh a ni leh vek dawn te hi lawmawm kan ti hle zawk a ni, an ti bawk.