Aizawl; Zirtawpni kalta zana Lammual-a Mahindra 2 Wheelers Mizoram Premier League Season 2 final khelha inkhel entu (fans) thenkhatin thutthleng (gallery seat) an tihchhiat chu 80 vel zet a tling niin thu dawn a ni. MPL final 2nd Leg-ah hian inkhel entu sing chuang awmin, he inkhelah hian Chanmari FC chuan 3-0 in Luangmual FC an hneh a, 1st Leg inkhel nen belhkhawmin Chanmari FC hi 4-2 in an chak a, an champion a ni. Final match ena lawmman semtu Mizoram Football Association (MFA) President hmasa ber Lal Than-hawla chuan, inkhel entu mipui lamin zan lama inkhelh zo lo a, thil pawi thlen zawnga khawsak an ching zel dawn a nih chuan sor-karin zan lama inkhelh chungchang hi a ngaihtuah nawn leh dawn tih a sawi a. "Tun hnu zel ah zan lama in-khelh hi suspend chang a awm thin lo ang tih pawh sawi theih a nilo, hetianga rohlu tichhe zawnga khawsak hi kan duh lo a ni," a ti. MPL final khelh lai hian, referee thutluknaa lungawilohna lantirin fans lam atangin gallery seat thahnem tak tihchhiat a nih bakah inkhel tibuai zawngin ground chhungah bottle ruak tam tak nen vawmluh a ni a, security hliam an awm nual bawk. He thil thleng avang hian inkhelh lai pawh hun engemawchen chawlhsan a ni nghe nghe. Hetianga fans thenkhatin gallery seat an tichhe vak mai chu pawi an tih thu sawiin, remchang hmasa-ah he thil thleng chungchang hi ngaihtuah a ni dawn tih MFA hruaitu pakhat chuan Zalen a hrilh a. "Review Meeting neih hunah kan sawi ang," a ti.