LBS Suzuki All Mizoram Inter Village Football Tournament quarter-final game-3 leh 4 vawiinah khelh a ni leh dawn a, mahni tanzawng au phura lam turin lammual i pan ang aw!

Chawhnu dar 12:30 hian team anga Mizoram football-a hming langsar lutuk ngai lo Sialhawk VC team leh Farkawn VC team an inhmachhawn dawn a, field chhung boruak a sang dawn tih a chiang reng. 

Chawhnu dar 3:30-ah Mizoram football-a hming lian pahnih leh Aizawl khawpui chhung veng nibawk Armed Veng South LC team leh Ramhlun North LC team ten game-4 na an khel ve thung dawn a, mual chhung leh pawn boruak a hot dawn tih a chiang reng. 

Mizoram chhim-chhak lama awm Sialhawk hi khaw lian an ni lo, Mizoram football-ah pawh team ang chuan an hming kan hre langsar lo. Mahse, tun tournament-ah zet chuan team boruak nei lian ber pakhat an ni a, an khelh hnuhnung match pahniha Kawnpui Venglai VC leh Mamit Jt VC 3-0 ve ve a hneh thei hi team chhia an ni lo tih a chiang.

Footballer lar I League nomawi chawi tawh R. Laldanmawia hruaina hnuaia khel Sialhawk hmachhawn tur khawchhak ramri dep a awm Farkawn pawh hi an tunhma record atanga thlir chi an ni lo. Kolasib Jt. VC leh Salem Veng LC dahthatu Farkawn VC team khel hi a hmuhnawm thei hle a ni. Anni khaw nih chak zawk i hre duh a nih chuan vawiin chawhnu dar 12:30 ah Lammual rawn pan ve mai rawh. Aizawl a i awm lo a nih pawhin Zonet-in youtube atangin an pe chhuak leh dawn a ni. 

Tun tournament-a goal 9 khung tawh Danmawia leh striker tlanchak Rotluangliana te inkhawp hi Farkawn defender te buaina tham chu a tling ve ang. Sialhawk hian tun tournament-ah goal 30 khung tawhin goal khat chiah an la chhuah. 

Quarter-final game-4 na hi chawhnu ni daih deuh tawh dar 3:30 ah Mizoram football-a veng hming lian pahnih Armed Veng South leh Ramhlun North te an inhmachhawn ve thung dawn a, team tha Bawngkawn LC leh Thenzawl West VC team hnehtu Ramhlun North hian goal an la khung tam lo hle a, an quarter-final zinkawngah goal 12 chiah la khungin goal 5 an chhuah tawh thung a, hun pangaiah an tumpui team te hneh vekin penalty hmanga chak an la nei lo. 

Ke hmang thiam pahnih  Captain C. Lalchhuanawma bakah K. Lalrosanga an nei a, an zam mai lovang. An hmachhawn tur Armed Veng
South hian Indian Super League club Jamshedpur defender Laldinliana Renthlei leh FC Goa defender tho Lalhmangaihsanga te an nei a, an tlarhnung a phui tha a, an match hnuhnung pahnihah pawh goal an chhuah lo a ni. 

Aizawl veng lian pahnih thiam zia hi i hre duh a nih chuan Lammual lamah rawn kal ve mai rawh.

LBS Suzuki All Mizoram Inter Village Football Tournament 2022

Vawiin Inkhel tur
Farkawn VC                    12:30 PM  Sialhawk VC
Armed Veng South LC    3:30 PM   Ramhlun North LC

Farkawn luh chhauh dan

First Round
Kolasib Jt VC, Diakkawn 2-3 Farkawn VC
Round of 128
Bungtlang South VC 0-4 Farkawn VC
Round of 64
Darlak VC 2-5 Farkawn VC
Round of 32
Thiltlang VC 2-3 Farkawn VC
Round of 16
Salem Veng LC 1-1 Farkawn VC
(Penalty shootout-ah Farkawn 4-3 in an chak)

Sialhawk luh chhauh dan
First Round
Tuikual North LC 1-5 Sialhawk VC
Round of 128
Samtlang VC 0-6 Sialhawk VC
Round of 64
Selesih VC 0-13 Sialhawk VC
Round of 32
Sialhawk VC 3-0 Kawnpui Venglai VC
Round of 16
Mamit Jt VC 0-3 Sialhawk VC

Armed Veng South luh chhauh dan
First Round
Armed Veng South LC 11-1 Mimbung VC
Round of 128
Edenthar LC 0-3 Armed Veng South
Round of 64
Chaltlang LC 2-3 Armed Veng South LC
Round of 32
Armed Veng South LC 3-0 Khawlailung VC
Round of 16
Armed Veng South LC 6-0 Bungkawn LC

Ramhlun North luh chhauh dan
Round of 128
Ramhlun North LC 4-1 Ramhlun Venglai LC
Round of 64
Falkawn VC 2-4 Ramhlun North LC
Round of 32
Ramhlun North LC 1-0 Bawngkawn LO
Round of 16
Ramhlun North LC 3-1 Thenzawl West VC