January thla tawpa Everton-in an manager atanga Frank Lampard an bân lai khan Premier League-ah 19-naah an awm a, England midfielder hlui hian a khelhpui hnuhnung vawi 11-ah hnehna vawi khat chiah a chanpui.

April thla tira Chelsea-in Graham Potter-a ai awh lailawk tura an lak luh leh hnua a khelhpui hmasak vawi rukah a tlawmpui leh vek bawk a, a hun laia midfielder tha bik hian chak ni hmel a hmu hleithei lo.

Mahse, tlawm zawka tang reng tura duan a ni bik lo, Inrinni zanah Bournemouth khelmualah Chelsea chu 3-1 in a chakpui ve ta a. Inkhel vawi 16 zet a team enkawlte chak hmel a hmuhpui tawh loh hnuah a vawi 17-naah hnehna a chang ve ta a ni.

Blues tan pawh March 11 hnua hnehna an chan lehna hmasa ber a ni ve bawk a, hun a tawp meuh chuan Dorset-a zuitu an fan baihvai tawh takte pawh phur tharin, ‘we are staying up’ tiin an zai rual dual dual a ni.

Vitality Stadium-a inkhelah hian Lampard-a team hian hma takah goal thun mah se an insuttir a, hun tawp dawna goal hniha an chhanlet lehna hmangin hnehna an chang.

Minute kuana lekah Conor Gallagher-a’n tauh lutin Chelsea-in hma an hruai a; mahse, minute 21-naah Matias Vina chuan mual neitu lam tan sutin minute 82-ah Benoit Badiashile leh 86-ah Joao Felix ten Blues tan thunin Premier League-a vawi li an tlawm zawn hnuah mikhual khelmual atangin point thum an hum haw thei.

Mual neitu, Cherries hian khelh thum an la nei a, chhiarkawp dana chhutin tla thei an la ni a. An hmabakah Crystal Palace, Manchester United leh tlakhniam hlau, Everton an la awm a, Championship-a an let leh nghal loh nan Gary O’Neil-a team-in thapui an la thawh a ngai dawn.

Chelsea erawh an dinhmun kâng hretin 11-naah an awm ta thung.

Chelsea hi Lampard-a hun hma atang tawhin tun season-ah tlahniam thei dinhmuna awm team thumten umphak theih loh lai neiin an la awm ngai miah lo va, tunah erawh chuan point thum an hawn nen a vawi khat nan a hniam pathuma mite um phak theih an ni ta bik lo.

Lampard-a mi mal bikah Chelsea a chakpui hnuhnung ber leh tuna a chak inkarah hian ni 832 zet a tla a. A khelhna hlui a enkawl hmasak lai khan FA Cup-ah January, 2021 khan Luton Town a hnehpui a, a hnu lawkah a chhuak zui a, a enkawl nawn lehah chak ni hmel a hmuh lo zui reng a, tunah a chak ve ta a ni.