ZALEN August 25, 2026: Mizoram Larsap General (Dr) Vijay Kumar Singh hmalaknain Mizoram State Cancer Institute (MSCI), Zemabawk, Aizawla hman tur Cancer Screening Test Kit 3,875 te chu tunhnai khan USA atangin a thlawna dawn a ni. Test Kit-te hi Larsap hmelhriat USA-a awm, Dr. Dahiya leh Dr. Chauhan ten an rawn pek a ni.

Cancer Screening Test Kit hrang hrang lo thlengte hi thin cancer vei leh vei loh screening tihna Alpha Feto Protein test kit 975, rilpui cancer vei leh vei loh screening tihna Carcinoembryotic Antigen test kit 950 leh Fecal Occult Blood test kit 975 bakah prostate cancer vei leh vei loh screening tihna Prostrate Specific Antigen test kit 975 te a ni a. A vaiin test kit 3875 a lo thleng a ni.

Larsap General (Dr) Vijay Kumar Singh chuan mipuite hriselna chu State hmasawn nana pawimawh hmasa a nih thu sawiin, cancer tamna leh thihpui tamna State kan ni chu veiawm a tih thu a sawi a. Cancer hmuhchhuah hmaa enkawlna tha pek chu thil pawimawh tak a nih thu sawiin, USA atanga test kit a thlawna dawnte chu tangkai taka hman a nih ngei a beisei thu a sawi a. Cancer dona kawnga hmalak pawimawh a nih thu sawiin, Mizoram mipuite hrisel nan theihtawp chhuah zel a tum thu a sawi a ni.