Aizawl: Mizoram rawn tlawh mek Director General, Border Roads Lt. Gen. Suresh Sharma chuan Zirtawp tlai khan Mizoram Governor Lt. Gen. Nirbhay Sharma leh Chief Minister Lal thanhawla te a kawm a, Mizoram chhunga BRTF kawngpui enkawl mek chungchang a sawipui. DG Border Roads Lt Gen Suresh Sharma chuan Mizoram Larsap hnenah Mizoram chhunga kawngpui an siam leh enkawl chungchanga harsatna an tawh hrang hrangte a hrilh a. Tun dinhmunah Project Pushpak hnuaiah Mizoramah chuan an kawng enkawl a tlem tawh avangin taskforce 1 chauh an dah tawh thu leh sum lamah harsatna engemawchen an neih avangin hei aia changtlung zawka Mizoram chhungah hna an thawh theihna atan tan lakpui turin Larsap a sawm a. BRTF chuan Lengpui Airport-Buichali kawng leh Mizoram chhimlama kawng pui thuam 3 siamthat nana sum an hmuh tawh thu hrilhin kawngpui siam/zauh nan ram an mamawh belh tur chu state sorkar hnenah an thlen tawh thu a hrilh bawk. DG Border Roads hi CE Pushpak KK Razdan-in a tawiawm a ni. Mizoram Governor Nirbhay Sharma chuan ramchhung hmun hrang hranga BRTF te hnathawh fakin Mizoram chhungah pawh an thawhrimna zarah kawngpui tha hmun kilkhawr ber thleng a awm phah a ni, a ti a. Tun hnaia Mizoram chhimlama a zin a, Parva khua thleng a kal thu sawiin BRTF kawng enkawl lai pawh a chhe hle tawha a hmuh thu a hrilh a. DG-in harsatna a sawite chu lo bawhzuipui a, theihtawp a lo chhuahpui tur thu a hrilh a ni.