Aizawl: Mizoram Larsap Lt. Gen. (Rtd.) Nirbhay Sharma chuan Krismas leh Kumthar pualin Mizoram mipuite chibai a buk. Krismas leh Kumthar puala chibai bukna thuchah a siamah Larsap chuan Krismas chu hlimna hunpui a ni tiin inngaihtlawmna thinlung nena midangte tana luanchhuahna leh inpekna ni a ni, a ti a. “Pathianin kan tana thil thlawnpek hlu tak Isua Krista min pe ang hian keini aia rethei zawkte tanpui ila, chutichuan he Krismas in a tum bulpui ber hi kan phawk chhuak thei dawn a ni,” a ti. Larsap chuan Mizoramah kum khat leh a chanve a cheng tawh tih sawiin Mizo mipuite chu hlimna leh lungawina pu in ni tiin, “Hnam tha leh hnuaihnung inthliarna awm lova kan khawsa hi a chhinchhiahtlak a, inpumkhatna thinlung nghet tak kan put hi i vawng nung reng ang u,” a ti bawk. Larsap Lt. Gen. (Rtd.) Nirbhay Sharma chuan Mizoram mipuite chu nitin nun vawng uluk lehzual turin a ngen a. Cancer natna vei, ruihhlo ngai leh HIV vei tihtlem kawnga hmalaknain hma a sawn chak thei lo chu pawi a ti hle tih a sawi. Larsap chuan Mizo khawtlang nun inpumkhatna chu a chhuanawm viau rualin hnam dangte nena kan inkara daidanna bang siamtu a ni thei nia sawiin khaw khata cheng ang maia khawvel hmun hrang hranga mite an khawsakho tawh lai hian inkharkhip tlata kan khawsak reng a rem tawh lo a ni, a ti. Inthiarna mumal nei lo awm lohna Open Defecation Free (ODF) State ni tura hmalakna chuan a tilawm hle tih Larsap chuan a sawi bawk a. Mizoram mipuite chu remna leh muanna vawng nung zel turin a ngen bawk.