Grand Slam single-a vawi 20 champion tawh Roger Federer chuan tun thla a neih tur Laver Cup khelh zawhah tennis a chawlhsan tawh dawn.

Tum thum lai a khup an zai tawh Swiss mi Federer-a hi tunah kum 41 a ni tawh a, 2021 Wimbledon zawh atang khan inhliam vangin a la inkhel leh lo.  

A chawlh tur chungchangah Federer chuan,"Tun hnaia ka taksa thuchah min hrilh chu a chiang ta hle mai. Kum 24 chuang tennis khawvel ka cham chhungin match 1,500 chuan ka khel hman a ni. Tunah chuan engtikah nge ka competitive career hi ka chawlhsan dawn tih ka hriat chian a ngai ta a ni. Tennis game-ah chuan ka hmangaih che a, ka kalsan ngai lovang che," tiin a sawi. 

Federer hi khup lam natna vangin kum thum chhung chu a inkhel mumal thei tawh lo va, 2020 atang khan Grand Slam 11 zinga 3-ah chiah a in lan thei a ni. Nikum nipui laia Wimbledon quarter-final-a Hubert Hurkacz a hneh loh hnu khan competitive match a la khel leh lo. 

Federer hian Grand Slam mipa single trophy 20 la tawhin trophy 22 latu Spain mi Rafael Nadal leh trophy 21 la tawh Serbia mi Novak Djokovic te pahnih chiah a chungah an awm a ni.