ZALEN, December 06, 2025: Lawmman Rs. nuai 44 awmna, Joy Heyball International Open – India Stop khel turin Zirtawpni zan khan Mizo player paliin Chandigarh an pan.

Mizoram Snooker & Billiards Association (MSBA) player pali - C Vanlalrinawma, Lalrina Renthlei, Lalsangzela leh PB Liansangzuala te hian Sairang atangin relin Delhi an pan hmasa a. Inelna hi Inrinni atanga khelh tan tur ni mah se an kalna tur thlawhna hauh saten zin an thulh (cancel) zel avangin relin an kal phah a ni.

Inelna bul tannaah inlan thei lo mah se buatsaihtute chuan an khelh hun tur an siam remsak dawn a ni.

Ningani thleng inelna awm turah hian lawmman sem rel tur zawng zawng chu US $ 50,000 niin India pawisa chuan Rs. 44,00,000 a tling.

Joy Heyball International Open – India Stop hi World Pool-Billiard Association (WPA) leh Billiards & Snooker Federation of India (BSFI) hriatpuinaa Chandigarh Billiards & Snooker Association-in an buatsaih a ni.