Lawmman Rs Nuai 50 awmna chuh turin Mizo shuttler-te feh chhuak

India rama state hrang hrangte badminton-a inelna lian ber, lawmman pawisa fai ringawt pawh Rs Nuai 50 zet sem ralna tura inlan turin Mizo shuttler rualin Assam khawpui an pan.

Yonex Sunrise 85th Senior National Badminton Championship hi Nilaini atang hian khel tanin Pathianni thleng awh tur a ni a. Indian badminton star langsar tak takte hi TRP Indoor Stadium, RG Baruah Sport Complex, Nehru Stadium, Guwahati-ah an inel dawn a ni.

Mizoram team-a telte hi an awm hmun a inan loh hlawh avangin Thawhlehni khan chuan Lengpui Airport atang leh Hyderabad atangin inelna neihna hmun hi an pan khawm.

Mizoram Badminton Association (MBA) chuan Mizoram player-te hi hriselna tha neia tha taka an khelh theih nan duhsakna an hlan tih an sawi.

Tun tum tournament hi India rama state tinte badminton hmanga an inelna lian ber niin lawmman pawh a tha hle a ni.

Mizoram aiawha tel tur player-te:

1. Joseph Lalhruaitluanga, Chaltlang Lily veng

2. Joseph VL Ringngheta, Kulikawn

3. Saitluangpuia Sailo, Ramhlun Venglai/PGBA, Hyderabad

4. C. Lalramzauva, Durtlang

5. C. Lalramsanga, Durtlang/BAI NCE, Guwahati

6. Lalrinhlui, Saron Veng

7. Laldingpuii, Mission Veng

8. Abigail Lalthazuali, Saron Veng

9. Ramngaihzuali, Ramhlun South