Aizawl : MNF Core Committee member H.Rammawi chuan Lawngtlai district a tar pension la te chuan kum khat chuang pawisa an dawng tawh lo tih sawiin an mangang hle niin a sawi. Nimin Aizawl Press Club-a thuthar lakhawmtute a kawmna ah H.Rammawi chuan, “Lawngtlai, Sangau leh Bualpui a tar pension la mek te chuan kum 2016 kumtawp lam leh 2017 atang te khan pension hi an la tawh lo a. Mi tam takin harsatna an tawk mek a ni,” a ti. H.Rammawi chuan Social Welfare Department chuan pension an dawn loh chhan hi pensioner ten Bank Account an neihloh vang niin an sawi a, mahse Account hi an nei vek a, hei baka an chhuanlam siam signal that loh vang leh current awm that loh vang nia an sawi pawh a dik lo niin a sawi bawk. H.Rammawi chuan SWD Minister in March 2018 thleng pawisa hi an pe tawh nia a sawi avangin tuna harsatna chu department chhung khawi maw laia thilthleng a nih a rin thu sawiin a tul chuan Law Court lama kal turin an inbuatsaih mek niin a sawi bawk. Tun dinhmunah tar pension dawng Mizoram ah mi 25,469 an awm mek a, hengte hi Aizawl District-ah mi 9,214, Serchip-ah mi 1,562, Champhai-ah mi 2,755, Kolasib-ah mi 1,320, Mamit-ah mi 2,058, Lunglei-ah mi 5,265, Lawngtlai-ah mi 2,057 leh Siaha District-ah mi 1,238 te an ni. Pernsion hi kum 60 chin chung lam tan thla khatah Central-in Rs. 200 leh Mizoram sawrkarin Rs. 50, a vaiin Rs. 250 pek a ni a, tunah hetiang hi mi 21,202 hnenah pek mek a ni. Kum 83 leh a chung lam mi 4,267 hnenah pension pek a ni bawk a, Central-in Rs. 500 leh Mizoram sawrkarin Rs. 50, a vaiin Rs. 550 thla tin a pe a ni.