Aizawl August 4, 2024 : Lawngtlai District Petroleum Dealers-te chuan an harsatna leh buainate chinfel a la nih loh avanga July ni 29, 2024 (Thawhtanni) atanga load an lak loh hnuah Zirtawpni atang khan an lungawilohna titawpin, dan pangngaiin load an la chhunzawm.

Lawngtlai District Petroleum Dealer te chuan thuchhuah siamin July 29,2024 atanga tuialhthei an chah belh tawh loh avangin Lawngtlai District chhunga Filling station-te chuan tuialhthei dahkhawl an nei tlem tawh a, sawrkar hotute, tlawmngai pawl hruaitute leh Kohhran hruaituten an ngenna a zahawm an tih bakah mipui tan hun rei tak harsatna siam sak tha an tih loh avangte leh harsatna an neih thenkhatte chin fel anih theih dawn avang te in tuialhthei chahluh loh an kalpui chu titawp an ni tih an sawi.

ZALEN thudawn danin Lawngtlai district-a tlawmngai pawl lian ber Central Young Lai Association chuan an district chhunga oil te hi Myanmar lamah a ruka hralh a tam nia hriain hemi tihtawp anih theihnan hian hma an la a. Hetih lai hian Lawngtlai District Petroleum Dealers te chuan Lawngtlai district chhunga Petroleum retail outlet dealers te chuan Oil marketing company guideline in a phalsak angin sumdawnna an lo kalpui tawh thin a, mahse tunhnaiah an sumdawnna atan hartsatna siam thei zawngin pawn lam mi nasa takin an inrawlh tniin an sawi a. Tha taka sumdawng thei tura zalenna an neih chu dik lo taka rahbehsak an ni chho mawlh mawlh nia sawiin an sumdawnna in nasa taka a tawrh phah thu leh company lamin monthly sales target an tuk zat pawh tlin thei lo mai thei dinhmunah an ding mek niin an sawi.

Harsatna awm chingfel tur hian Lawngtlai DC pawhin hma lain oil barrel 5 chin chunglam la turte chu DC atanga phalna lak ngai turin ruahmanna an siam a, mahse YLA lamin barrel a dawh tur hrim hrim chuan DC phalna la hmasa se an tih avangin a hmaa order lo tihchhuah tawh chu sut leh a ni a. Hei hi Lawngtlai District Petroleum Dealers-te chuan an duh lo nia thudawn a ni. Lawngtlai atanga thudawnna pakhat chuan Myanmar lama oil an hralh hi to bakah pawlh a nasa hle niin an sawi bawk.

Lawngtlai district chhungah hian petroleum dealer 5 an awm mek a, heng zinga 3 hi Lawngtlai khawpui chhunga awm niin 1 hi Sangau leh a dang pakhat hi Bungtlang South a awm a ni a. Khaw hrang hrangah hian lirthei nei an awm nual avangin khaw tin deuh thaw-ah blacker hi an awm a, heng mite hian a hralh leh tur a hlawma oil hi an lak a ngaih avangin an lei lawk a ngai thin a. Heng blacker te hi petrol pump-te customer lian ber nia thudawn a ni bawk.