Aizawl: Lungzarhtum-Tlangpui, Lawngtlai District a bawng vulh zinga mihring tana hlauhawm ramsial (Bos gaurus) lo awm, March 13, 2017 a hmuh chhuah chu lakchhuah a la ni lo va, Environment & Forest Department chuan lakchhuah a nih theih nan hma an la mek. Chhimtuipui Wildlife Division-a Deputy Conservator of Forests PC Lalchhandama chuan bawngvulh zinga ramsial awm chu lakchhuah theih a la nih loh thu sawiin, “Aizawl PCCF ah proposal kan thehlut mek a, hma lak zel kan tum a ni,” tiin Zalen a hrilh a. Lai Autonomous District Council (LADC) in ramsial awmna bul hnaiah hian warning signboard pathum an siam tih sawiin PC Lalchhandama chuan LADC nen te pawh tang hoin theihtawp chhuah an tum thu a sawi bawk. Tun hnaia ramsial in scooter khalh lai mi pakhat a beih leh Lawngtlai Thunder Club member a phin bak chu mihring a la bei leh lo niin PC Lalchhandama chuan a sawi bawk. Thudawn danin ramsialin a awmchilh bawng rual vulhtu Lalcheua chuan ramsial a awm atangin bawnghnute a la sawr thei lo va, bawng hnute sawr theih bawngpui pali a neih mek te chu sawr theih an nih tak loh avang leh a bawng rualte chu a thunun theih tak loh avangin Environment & Forest Department-ah compensation a dil. Thudawn danin ramsial hian bawng rualte hi thunun vekin a chang chuan haw lovin ramah a riahpui vek thin a, loneitute huan thlai pawh an eiin an tichhe thin ni a thudawn a ni bawk. Lawngtlaia Chhimtuipui Wildlife Division lam chuan Aizawl PCCF office-ah rawtna an rawn thehlut tawh a. Heng rawtna hmang leh a tul dan ang a rang thei anga hmalak a nih dawn thu an sawi bawk.