ZALEN, Apr. 20, 2026: Kumin January 1 atanga April 7, 2026 chhungin Lawngtlai district-ah police-ten thubuai 38 an ziak lut tawh.

Vawiin khan Lawngtlai SP PC Lalchunglura hovin a office chamber-ah crime review meeting neih a ni a, SP Lawngtlai, Addl.SP, SDPO bakah Lawngtlai khaw chhunga police officer eng emaw zat an tel bakah Lawngtlai pawn atangin online-in an rawn zawm ve bawk.

SP chuan meeting-a tel zawng zawngte hnenah lawmthu a sawi a. Police officer-te chu mipui rawngbawltu an nih angin tanpuina beiseia an hnena lo kalte tibeidawng lova a theih chin china an lungawina an zawnsak a tulzia a sawi bawk.

Meeting-ah hian kum 2025 chhunga case register leh kumin April thlenga case register-te khaikhin leh zirho a ni a. Nikum chhung khan case 69 register niin January 1, 2025 atanga April 17, 2025 inkarah case 19 chauh register a nih laiin kumin January 1 leh April 7 inkarah 38 register a ni tih tar lan a ni.

Meeting-ah hian case pending leh an pending chhante sawi ho a ni a, SP Lawngtlai chuan investigating officer-te an case-ah theihtawp chhuah zel tura a fuih bakah officer dangte pawh inrawn kuala theihtawp inchhuahpui zel turin a hrilh.