ZALEN July 29, 2023 : Vawiin khan Rev Vanlalbela chuan Zemabawk-ah LBS Kia showroom a hawng a, Pathianin hmeithaite a ensan lohzia lantirtu a ni tiin, Seltos thar an tlangzarh zui nghal. LBS neitu Nu ber chuan an sumdawnna karah rinhlelh an kai tih a sawi a, chutihrualin thil dik lo pakhatmah an sumdawnaah a tel lo tih a sawi.

Korean company Kia dealer LBS Group chuan Mizorama car an hralh chhuah atanga thla 10 hnuah dan pangngaiin showroom an hawng a; September 28, 2022 khan car hralh tanin July 29 thleng 231 an hralh chhuak.

LBS Kia showroom hawngtu Rev Bela chuan  "Pathian chu hmeithaite pa, rin tlak a nihzia a lang a, he showroom ropui tak hawn a nih rual hian Pathian hnathawh kan hmu thei a ni," a ti.

T Zosangpuii'n a pasal a sun hnuah a fate panga, hmeichhia pakhat leh mipa panga a tulpui a; LBS Kia Managing Director Lalnunthara Ngurte chuan bike second hand pakhat atangin sumdawnna bul an tan tih a sawi. "Tunah chuan company 10-ah dealer kan ni thei tawh a, Pathian hmangaihna vang chauh a ni. He showroom-ah hian Pathian a lal ber dawn a, ka sawi lan duh chu kan sumdawnna kalkawngah rinhlelhna kan tawk nasa a, mahse, ruihhlo leh thil dik lo pakhat mah a tel lo a ni tih hi a ni," a ti.

LBS Group hian hlawhtling takin Mizoramah Suzuki two-wheeler dealership an kalpui mek a, car duang mawi thiam Kia dealership an hawn bakah German motor company Force dealership hmu fel tawhin hawn an la hmabak a ni.

Kia hian SUV hriat hlawh Seltos tuai tharin July 4 khan India ramah tlangzarh a ni tawh a; Mizoram-ah Kia showroom hawn a nih hnuah khuh hawngin mi pathum hnenah an pe chhuak nghal a, Seltos hlui zawk 87 an hralh chhuak hman a ni.

A thar hi a hranpaa booking an hawn loh avangin a duh tan lei nghal theih zel a nih thu an sawi a, a man tlawm ber Rs 12,06,219 a nih laiin a to ber Rs 21,69,117 a ni.

LBS KIA 
(Sept 2022 atanga July 2023 chhunga car an hralh dan)

Sonet (on-road : Rs 8,80,946 - Rs 16,33,150) - 127
Seltos (on-road : Rs 12,06,219 - Rs 21,69,117) - 90
Carens (on-road : Rs 11,60,738 - Rs 20,54,974) - 13
Carnival - 1

A vaiin - 231