Aizawl: Mission Vengthlang Local Council (MVLC) chuan nimin zing dar 7:30 khan Local Council House, Mission Vengthlangah khawtlang himna atana vengchhunga an vuah thar Closed-Circuit Television (CCTV) hawnna chu an hmang a, AMC Ward XIV Councillor, Lalhmingmawia’n a hawng. He hun hi bialtu MLA Vanlalzawma'n a hmanpui bawk. CCTV hawngtu AMC Ward XIV Councillor Lalhmingmawia chuan thu sawiin Mizorama veng bila CCTV hmang hmasa ber an ni chu lawmawm a tih thu sawiin vengchhunga mi thahnemngai te avanga he dinhmun hi thleng an nih thu a sawi a. “Tunlai khawvelah sualna in bu a khuar a, tumah tlaivara duty thei kan awm lo a, lo viltu camera awm se kan ti a ni,” tiin a sawi bawk. Lalhmingmawia chuan CCTV chu Aizawl khawpui chhung hmun pawimawh ah te dah a nih thu sawiin sorkar sum harsatna avangin a tul lai zawng zawngah pawh dah kim theih a ni lo a, chutih laia Mission Vengthlangin an veng bila an nei thei chu lawmawm a tih thu a sawi bawk. CCTV hawnna inkhawm hmanpuitu bialtu MLA Vanlalzawma chuan Mission Vengthlang chu veng bil a CCTV vuah hmasa ber an ni thei chu an bialtu Councillor, Local Council leh veng mipuite a lawmpui thu leh a chhuan thu a sawi a, veng dangte tihhmuhtu an ni dawna a hriat thu leh tha a tih thu a sawi bawk. Mission Vengthlang Local Council hian CCTV atan hian Rs nuai 7 sengin vengchhung hmun 4 ah camera 7 an dah a. Camera te hi Pan-Tilt Zoom camera 3 leh Bullet camera 4 niin 2 megapixel night vision nei tel nghal a ni bawk.