Aizawl; Nikum sorkar kum chhung khan Urban Local Body (Local council-te) leh Rural local Body (village council) te tan state sorkarin a huna pawisa a pek chhuah loh avangin a nih tur angin sum hman hman loh a awm nual. Comptroller & Auditor General of India-in Urban Local Body-te a zir chianna Annual Technical Inspection Report-in a tarlan dan chuan, UD&PA deptt-in inkaihhruaina tur anga a huna sum a pek chhuah loh avang in Aizawl Municipal Council chuan Capital Asset siam tura hnathawh tura ruahman, pawm sa vek tawh a thawk thei lo a. Sum pek tlai avang hian fund awmsa tawh cheng vbc 5 leh nuai 93 atangin cheng vbc 3 leh nuai 22 chu sorkar kum kalta chhung khan hman loh a ni. Kum 2012-13 chhung khan state sorkar chuan sum a pek chhuah tlai avanga hremna atana a pung (Penal Interest) Rs.17,41,000/- chu a 'release' lo bawk a, AMC-a EE-in Ward 19 tana hna tenau 316 a ruahman Rs.2,37,25,000/- hu chu kum 2007 Schedule of Rate zulzuia a siamah Contractor hlep tur za zela 10 paih tel lova siam a nih thu tarlan a ni bawk. AMC hnuaiah hian Annual Budget leh Account vawn dan tur National Municipal Accounts manual (NMAM) format zulzuia kalpui tura tih chu a nih tur anga vawn a ni lo a. Mizoram Finance Commission-in Local Bodies te kum 5 chhung report , April ni 1, 2013 leh March 31, 2018 inkar thleng tur a siam lailawk tur chu tun thlenga thehluh a la nih loh avangin Local Bodies te sum dinhmun leh hmasawnna tur hi awmze neia kalpui theih a la nih loh thu tarlan a ni bawk a ni. He report-ah hian thingtlang VC (Rural Local Bodies) te tana sum bithliah tawh chu state sawrkar in a hunah a pe chhuak lo bawk a. Ni 2 atanga ni 146 inkara tlaia a pek chhuah hlawm avangin, Penal Interest Rs.7,15,000/- a chawi a, record mumal a awm loh avangin hna tan hun leh zawh hun hriat chian theih a ni lova, audit chuan an hna te chu ruahman ang leh senso tur hisap mila tawh a nih leh nih loh a finfiah theilo bawk.