ZALEN November 24, 2025: Mizo Hnam Run inkhawm political session-ah MNF Vice President leh Leader of Opposition Lalchhandama Ralte chuan thu a sawi a, Mizoram Chief Minister chuan Lunglei-ah Press mite hmaah dawt tam tak a va sawi a, CM hi Kim Jong Un-II kan ti dawn nge, dictator takin ro a rel a, ama hova kan pass kha, amahin a lo thiat leh mai, a ti.

Lalchhandama Ralte chuan November 20, 2025 khan Mizoram Assembly tihbawrhbanna a thleng tih sawiin, Mizoram State University dinna tur chungchangah Chief Minister-in Lunglei press mite hmaah dawt tam tak a sawi, tiin. “NEP 2020 chu India ram zirna hmasawnna tur, state zawng zawngte zawm tur ni a, hemi avang hian Mizorama zirna inte thiamna leh certificate petu tur State University din a lo tul ta a. MNF sawrkar khan State University atan Cabinet chuan July 31, 2023 khan kan rel a. Aug 16, 2025-ah Bill Drafting Committee din a ni,” a ti.

“ZPM sawrkar thar chuan drafting committee hma a laktir a. March 4, 2025-ah bill chu pass a ni ta a. MNF ministry kha draft stage-ah kan awm a, a hmun tur engmah a la awm lo. A hmunhma dahtu dik tak chu anmahni (ZPM sawrkar) an ni a, Aizawl-a dah tur an ti. Kan chief minister tih vek a ni a, heti lam (Aizawl)-ah ‘kan tih’ a ti a, sawti lam (Lunglei)-ah MNF tih a ti thung."

“Cluster institution-te kha MNF sawrkar thlan tiin a sawi a. Cluster college/institute order hi Oct 10, 2025 khan a chhuak chauh. Kan CM hian chawpchilhin dawt a sawi hnem lutuk. H&TE Minister hovin chak takin hma an la a, college an notify pawh minister-in a tlawh vek tawh bawk. Nov 20, 2025-a Lungleia University dah tur tih a puan lai khan Aizawla university hmunhma tura ruatah an la hnatlang luih luih a ni."

“MNF tih vek, titu hian Chhim lam tan MNF-in engmah ti duh lo angin a sawi a. Amah zawkin dawt chiang tak a sawi a ni. HTE Minister pawhin Lungleia state university a dah theih loh dan a sawi chu - inkalpawh zung zung a ngai, college panga neih a ngai, Lungleiah pahnih chauh a awm tihte a ni."

“Lunglei lamin an dil laiin a theih loh an ti a. Tunah a chhia zawng zawng hi engatinge min puh tak le? Dampa biala an tlak avangin mu leh mal an nei lova ngaihtuahna fim an hmang lo, an panic a ni. Assembly House-a University bill kan sawi khan an MLA paliten Lungleia dah an dil miah lo, Aizawla dah an thlawp thu leh MZSU Bill (Aizawl station) pass-tu nih an inchhuan thute an sawi a. Lungleiah awm rawh se titu kha Opposition bench zawk kan ni. ZPM MLA pakhatmah khan Lungleia dah an sawi lo," a ti.

Leader of Opposition chuan, “Kan CM hi Kim Jong Un-II kan ti dawn nge, dictator takin ro a rel a, ama hova kan pass kha, amahin a lo thiat leh mai a. Ngaihtuahna fim hmang se heti hian a khawsa ang em? An rawn dil laia phal lova, MNF tih veka puh duhtu a ni. Dictator ang maia ram lu berin a duh dan a puang mai hi HTE Minister thluak fim tak hian a ngaihtuah nawn leh dawn em? University hi ngaihtuahna fim taka din tur a ni. Kum thar bill-ah rawn pu lut rawh se kan lo pass pui ang." 

“Zirna hi politicize lo turin ka ngen a. Lungleia State University dah tumna ni ‘tha ba rulhna’ mai mai ni lovin, an duh tak tak a nih chuan ngaihtuahna fim takin ti se, kan thlawp ang. MZU Southern Campus kan neih theih nan MNF sawrkarin nasa takin hma kan la. Pukpuiah ram 300 acre kan siam fel hman. University peng lian awmna turin hma kan la zawk a ni,” a ti bawk.