ZALEN July 27, 2026: MNF Vice President & Leader of Opposition Lalchhandama Ralte chuan vawiin khan Mizo Hnam Run chhung inkhawm - political session-ah thu a sawi a, MNF-in FCRA a do tlat thu leh Lok Sabha leh Rajya MP-te chu abstain mai mai lo turin an phut thu a sawi.

Foreign Contribution (Regulation) Act (FCRA) awmzia sawiin Lalchhandama Ralte chuan, FCRA chu Kohhran, NGO, Society, etc. ten foreign atanga tanpuina an dawn enkawlna dan a ni a. FCRA Dashboard-a a lan danin Mizoramah ‘Associations Registered’ 78 awmin, heng zinga 34 chu license thi leh license Cancel 35 an awm a. Active chu 19 an awm, a ti.

FCRA Amendment 2026 ah hian foreign contribution dawng thei tho si, tih hleih theih lohin siam an tum a. Mizorama school, fahrah enkawlna leh thil dangten an tuar dawn. Hei hi Kristianten an dodal nasa a ti.

“He danah hian an hmunhma (asstes) laksakna dan te, SBI Main Branch-ah chauh tanpuina sum a lut thei tawh dawn a, Central sawrkar chuan engkim an centralized dawn a. FCRA hi MNF chuan do ngei ngei a duh a ni.

MNF chuan hma kan lo la daih tawh, July 7, 2026 khan Special Intensive Revision (SIR) 2026 Draft Roll chungchang inrawnkhawmnaah MNF chuan FCRA hi agenda-ah kan thawh a, sawiho ang u,do ang u, kan ti tawh a ni. Kan agenda erawh a kaltlang lo. FCRA kan duh lo thu vantlang hriatah kan puang chhuak tawh,” a ti a. “Kan President Delhi-a cham mek pawhin hotu liante hnenah kan duh lohna hi a thlen dawn a ni,” a ti.

MNF Vice President chuan, “FCRA hi Lok Sabha leh Rajya Sabha-a kan MP ten nasa taka an dodal kan beisei a. Abstain mai mai lo turin kan phut a ni. Nagaland leh Meghalaya-ah chuan an CM-ten kohhran hruaitute nen Delhi-ah hotu liante an sawipui tawh a. Keini pawhin hetiang tur hian kan phut bawk a ni,” a ti bawk.