Aizawl: National Students Union of India (NSUI) chuan Zirtawpni khan Sibys Farm-ah Students’ Union Leaders’ Meet an nei. Leaders meet hmanpuitu Agriculture Minister KS Thanga chuan, “Tunlai khawvelah tharum hmanga in pawngnek chungin ram leh hnamhumhalh theih a ni tawh lo a, thiamna sang tak nei chunga kan ram leh hnam mamawh chhanna nih hi thalaite leh zirlaiten kan tum tur a ni,” a ti. Minister chuan zirlaite chu ram leh hnam humhalh kawngah fing tak leh thiam taka ngaihtuahna seng thin turin a chah bawk. NSUI President Lalhmachhuana pawhin, “Zirlaite leh thalaite kutah hian kan ram hi a la awm dawn avangin tun atanga ram leh hnam hmangaihna rilru pe tlat chunga kan ram leh hnam tana nghahfak duhawm tak ni turin kan inbuatsaih a tul a ni,” a ti bawk. NSUI buatsaih zirlai hruaitu intawhkhawmna hunah hian Aizawl City College Joint Students' Union Union President Lalnunpuia pawhin thu a sawi a, Aizawl khawpui chhunga College SU hruaitute an kal kim hle.